Ahi Han Bus Naza-Mada & Labarik Mane 1 Iha Karreta Laran
Imajem : Bus Naza-Mada diresaun Viqueque-Dili ne’ebe ahi han hamutuk ho labarik mane ida iha Merkadu Taibesse, Dili,04/08/2024. Foto : Sosial Média
SAPNewsTL, Dili – Relasiona ho Ahi han Bus Diresaun Dili-Viqueque ho naran Naza-Mada iha Merkadu Taibesse, rezulta ahi han labarik mane ida ho idade tinan haat iha karreta laran.
Tuir informasaun ne’ebe SAPNewsTL asesu liu husi facebook Simão L-Mata haktuir, inséndiu ne’ebe mosu iha loraik ne’e rezulta ahi han bus Naza-Mada no labarik mane ida ne’ebe toba dukur iha bus laran.
“Ahi han karreta bus Naza-Mada, diresaun Viqueque-Dili, komfirma ona katak ahi han mos labarik mane ida ne’ebe toba dukur iha karreta bus laran”. Haktuir Simão L-Mata iha Merkadu Taibesse, 03/08/2024. SAPNewsTL screenshot
Simão L-Mata ne’ebe sai sasin iha fatin akontesimentu ne’e hatutan, durante ahi han bus refere labarik feto nain rua ho idade 11 no 12 konsege halai sai husi karreta laran maibe labarik mane ida ne’ebe ho idade tinan 4 mak la konsege salva an tanba toba dukur iha karreta laran.
“Labarik na’in 2 tinan 11 no 12 feto hotu mak konsege halai sai, maibe labarik mane tinan 4 ne’e mak toba dukur iha kadeira laran, entaun ahi han”. Nia informa
Tuir video ne’ebe SAPNews asesu hatudu katak, durante ahi han hela karreta refere, iha joven barak no komunidade lubun ne’ebe halai ba haree no halo video maibe la konsege hamate ahi tanba dook husi bee.
Entretantu, inséndiu refere konsege hamate husi ekipa bombeirus munisipiu Dili, maske nune’e, maibe labarik ne’ebe iha karreta laran ne’e laiha ona iis.
Hafoin notísia ne’e publika, SAPNewsTL seidauk hatene kauza husi insidente refere, nune’e SAPNews sei tenta halo komfirmasaun ba kauza husi inside ne’e.
Notisia kompletu SAPNews sei buka tuir no kolleta hodi publika iha loron aban.
Jornalista : Marciana Fernandes