Altar Santu Tasi-Tolu Provizóriu Taka Ba Públiku

Imajem : Kordenador Jeral THS-THM Dioseze Dili, António dos Santos Oliveira, iha Tasi-Tolu,19/09/2024. Foto : Marciana da Conceição

SAPNewsTL, Dili – Kordenador Jeral THS-THM Dioseze Dili, António dos Santos Oliveira informa Altar Santu Tasi-Tolu provizóriamente taka ba públiku tanba sei halo moru protesaun

Kordenador Jeral THS-THM Dioseze Dili, António dos Santos Oliveira hateten Altar Santu Tasi-Tolu sei taka ba públiku atu asesu tanba kompanha sei hadia hela moru protesaun inklui ninia infraestrutura sira.

“Iha loron 11 Setembru, hafoin Amu Papa husik hela Timor-Leste, Bispu Dom Virgílio Kardeal hamutuk ho Prezidente THS-THM Timor-Leste entrega hela fatin ne’e mai ami nu’udar instituisaun seguransa uma kreda nian hodi asegura fatin santu ne’e no fatin ne’e agora sei taka provizóriu ba públiku tanba sei hadia nia moru no seluk tan”. Tenik Kordenador Jeral THS-THM Dioseze Dili, António dos Santos Oliveira ba SAPNews iha Tasi-Tolu,19/09/2024

Fatin Santu Tasi-Tolu asegura ho seguransa hosi Instituisaun FALINTIL – Forsa Defeza Timor-Leste, Polísia Nasionál Timor-Leste, Konsellu Polisiamentu Komunitáriu no Tungal Hati Semináriu, Tingal Hati Maria (THS-THM).

“Iha ne’e iha seguransa oin haat (4), husi parte igreza nian mak ami husi THS-THM no husi parte governu iha tolu (3) hanesan F-FDTL, PNTL no KPK (Konsellu Polisiamentu Komunitáriu”. António Informa

António dos Santos salienta sira nia parte hetan ona orientasaun hodi taka ba públiku provizóriu, hafoin konstrusaun remata maka seguransa sei loke hikas ba públiku hodi asesu.

“Iha ona desizaun husi parte estadu no kreda nian fatin ne’e sei taka provizoriu, tanba kompanha sei hadia hela fatin balun hodi fatin ne’e seguru hafoin loke ba públiku mai vizita, halo peregrinasaun no orasaun”.

Altar Santu Tasi-Tolu

Kordenador ne’e husu ba públiku hodi labele  halo vizita wainhira seidauk iha autorizasaun atu vizita ba fatin istóriku no fatin lulik Tasi-Tolu.

“Husu ba maluk sarani sira hotu, los duni katak fatin ne’e ba ita hotu laos deit ba estadu no kreda, maibe agora fatin ne’e sei taka hela, husu ita nia pasiénsia, ita hein deit orientasaun tuir mai bainhira uma kreda no estadu deside ona hodi loke hafoin ita loke ba komunidade hotu”. Nia sublinha

Enkuantu, Kompanha sei halo hela moru protesaun no arruma sasan sira iha Altar Tasi-Tolu, hafoin governu no igreza sei toma desizaun ba fatin santu ne’e ninia sustentabilidade.

“Daudaun ne’e konpaña sira halo konstrusaun ba rede hodi asegura karik komunidade sira mai vizita fatin ne’e labele lori kareta ka motor tama arbiru, fatin ne’e konsidera fatin santa no lulik tanba ita nia nai ulun uma kreda katolika mak mai prezide direita misa iha ne’e”. Nia informa

Tuir observasaun SAPNews iha terrenu nota katak vizitor sira barak  mak atu vizita maibé la autoriza tama tanba fatin refere sei taka ba públiku provizóriu, komunidade sira iha area Tasi-Tolu mós hatudu komportamentu diak asegura ambiente moos no kolabora ho ekipa seguransa ne’ebé destaka iha Altar Santu Tasi-Tolu.

Jornalista : Marciana da Conceição & Marino de Deus