Alerta Sedu ! APC & Operador Telkomcel Asina Akordu Kooperasaun
Imajem : Sekretáriu Estadu Protesaun Sivíl (SEPS) Domingos Mariano Reis, Autoridade Protesaun Civil no Vise Presidente Finansa Telkomcel iha Timor-Leste Dedy Edward ho nia ekipa, iha Salaun APC Kaikoli (24/09/2024).
SAPNewsTL, DíLI- Operador Telekomunikasaun Telkomcel iha Timor-Leste selebra akordu kooperasaun apoiu gratuita ba Autoridade Protesaun Sivil (APC), no lansa mensajem alerta antisipada sedu kona-ba Dezastre Naturais iha Timor-Leste.
Sekretáriu Estadu Protesaun Sivíl (SEPS) Domingos Mariano Reis hateten asina akordu kooperasaun ho operador Telekomunikasaun Telkomcel iha Timor-Leste atu tulun Autoridade Protesaun Civil (APC) ho gratuita hodi haruka mesajem alerta antisipada sedu kona-ba Dezastre naturais iha Timor-Leste.
“Asina akordu kooperasaun iha hetan apoiu gratuita ba Autoridade Protesaun Civil (APC) tulun halo deziminasaun ba informasaun kona-ba sistema alerta antisipada sedu kona-ba Dezastre naturais iha Timor-Leste ba ita nia populasaun iha Timor-Leste,” Dehan SEPS Domingos Mariano ba jornalista remata asina akordu Kooperasaun iha Salaun APC Kaikoli (24/09/2024).
Nia dehan, Operador Telkomcel oferese pakote úniku ida ba Autoridade Protesaun Sivil atu lansa mesajem gratuita ba populasaun sira iha Timor-Leste kona-ba situasaun klimátika sira ne’ebé akontese atu ema hotu bele antisipa kuandu dezastre naturais mosu.
“Entaun akordu kooperasaun ida ne’e sira to’o tinan ida, atu tulun ita nia Autoridade Protesaun Sivil, haruka mensajem antisipada sedu kona-ba Dezastre naturais ba populasaun sira, kuandu akontese sira iha ona informasaun atu hases aan ba iha fatin ne’ebé seguru salva sira nia vida,” informa nia.
Vise Presidente Finansa Telkomcel iha Timor-Leste Dedy Edward haktuir akordu kooperasaun ida ne’e operador Telkomcel sei oferese gratuita pakote espesial ida ba Autoridade Protesaun Sivil durante tinan ida kona-ba sistema alerta antisipada sedu kona-ba dezastre naturais iha Timor-Leste bele salva ema nia moris.
“Akordu kooperasaun ida ne’e ami sei servisu hamutuk oinsá bele reforsa sistema alerta ne’ebé existe ona durante ne’e tulun ita nia populasaun sira atu antisipa bainhira Dezastre naturais akontese sira bele salva vida,” dehan nia.
Entretantu partisipa iha selebra nota entendimentu ne’e maka Sekretáriu Estadu Protesaun Sivíl (SEPS) Domingos Mariano Reis, Autoriedade Protesaun Civil (APC) no Vise Presidente Finansa Telkomcel iha Timor-Leste Dedy Edward ho nia ekipa.
Jornalista : Dircia Baptista Belo