ASPN Realiza Formasaun Ba Treinador No Arbitrajen

SAPNewsTL, Dili: Asosiasaun Silat Padjajaran Nasional (ASPN) realiza formasaun ba treinador ho arbitrajen atu prepara ba kompetisaun nasional iha futuru tanba hetan apoiu husi governu liu husi Komisaun Regulador Arte Marsial (KRAM).

“Ohin ami halo formasaun ba treinador no arbitrajen sira tanba ami halo ona preparasaun ba realiza formasaun treinador ho arbitrajen ASPN nian, hahu husi fulan abril to’o agora, ami manda uluk karta ba koordenador ASPN Munisipiu sira prepara membru nain haat, rua ba treinador no rua seluk ba arbitrajen mai tuir formasaun”,

“Prosessu sira ne’e finaliza ohin tanba ami nia koordenador munisipiu sira haruka membru sira priense kriteria nune’e ohin membru nain-68 husi munisipiu 12 la inklui RAEOA tanba ASPN seidauk eziste iha ne’eba mai tuir formasaun treinador ho arbitrajen durante loron tolu”, dehan vise prezidente ASPN Teotonio Pinto ba jornalista iha fatin formasaun Aimutin, Dili sexta (15/09/2023).

Vise Prezidente hatutan, durasaun formasaun ne’e durante loron tolu husi loron 15 fulan setembru to’o 17 fulan setembru 2023, loron dahuluk teoria no loron rua seluk pratika.

Formador mai husi ASPN nivel nasional rasik tanba sira uluk hetan ona formasaun husi Federasaun Silat Timor-Leste (FESTIL) hamutuk nain lima mak fo formasaun ba arbitrajen no treinador.

Objetivu prinsipal mak atu prepara treinador para responde kampionatu nasional iha fulan novembru no prepara arbitrajen, nune’e ASPN realiza kampionatu nasional rasik no bele iha ona kuñesimentu hodi foti desizaun

Teotonio informa tan, orsamentu apoiu ba formasaun ne’e hetan husi KRAM ho 40% husi subsidiu ba organizasaun arte marsial sira ho montante 10,006 USD koloka ba funsionamentu sekretariadu

“Realizasaun formasaun ba treinador ho arbitrajen no kampionatu nasional depois ba kampionatu nasional, hafoin finaliza formasaun ne’e treinador sira sei fila ba prepara atleta mak sira sei hala’o iha fulan novembru”.Nia subliña

Sira mos sei halo renovasaun dadus membru nian ba KRAM tanba dezde KRAM hari’i sira submete ona dadus membru ASPN, sira tenki halo renovasaun tanba kada tinan membru aumenta nune’e sira sei halo renovasaun iha tinan oin.

Iha fatin hanesan, Presidente KRAM Octavio da Conceição hatete, ASPN nu’udar organizasaun boot tan ne’e sira presiza halo formasaun ba treinador ho arbitrajen prepara membru sira iha fatin treinamentu.

“ASPN nu’udar organizasaun boot iha ita nia rai, sira nia fatin treinamentu ba membru sira iha territoriu Timor-Leste hamutuk 98, nune’e sira presiza halo formasaun ba treinador ho arbitrajen para bele prepara membru sira diak iha kada fatin treinamentu”, tenik Octavio.

Octavio Salienta tan, dezde iha fulan marsu KRAM atribui ona subsidiu ba organizasaun arte marsial sira ne’ebe hamahan an iha FESTIL atu hala’o sira nia formasaun sira haktuir ba diretiva daruak KRAM publika iha 2022

Nune’e pratika arte marsial sira bele prepara treinador ho arbitrajen sira atu bele profesioniza arte marsial nu’udar modalidade desportiva tanba organizasaun arte marsial tenki kumpri no implementa diretiva daruak KRAM hatur pensamentu kontrusaun modalidade nu’udar desportu ida.

Iha Biban hanesan, Prezidente Federasaun Silat Timor-Leste (FESTIL) Hermenegildo Custodia Da Silva dehan, sira iha prinsipiu apoiu ASPN nia formasaun ne’e ho 100% tanba formasaun importante ba lider sira iha fatin treinamentu.

“Ami iha prinsipiu apoiu ASPN nia formasaun ba treinador no arbitrajen ho 100% la iha rezerva tanba formasaun importante ba lider iha fatin treinamentu tanba atu lori membru treinador sira tenki hetan formasaun nune’e formasaun arbitrajen ho treinador ne’e importante ba arte marsial hotu”, Hermenegildo hateten