Bebe 1 Mate Iha Sala Neonatal ! Alkatiri : “Tenki Kuidadu Ho Ahi”
Imajem : Eis Primeiru Ministru, atual Sekretáriu Jeral Partidu FRETILIN Mari Alkatiri hala’o vizita ba HNGV Dili,03/03/2025
SAPNewsTL, Dili : Eis Primeiru Ministru & Sekretáriu Jeral Partidu FRETILIN Marí Alkatiri preokupa bebe ida hakotu iis iha Sala Neonatal Hospital Nacional Guido Valadares (HNGV) tanba kauza hosi ahi mate.
Hafoin vizita, Eis Primeiru Ministru ne’e kestiona kona ba bebe ida ne’ebe mate tanba kauza hosi ahi mate hodi rezulta oxigêniu no ventilador la funsiona.
“Iha neonatal nian ne’e, ita tenki iha kuidadu ho ahi, ha’u komfirma katak horikalan jenerator la traballa, pelus menus iha bebe ida presiza iha ventilador no oxigêniu ida”.
“Iha dia 1-2 Marsu, bebe ida mate tanba laiha oxigêniu no ventilador, hatene ida deit maibe bele rua no tolu ka liu, ohin ha’u haree, bebe barak mak presiza hodi hetan tratamentu”. Tenik Sekretariu Jeral Partidu FRETILIN Marí Bin Amude Alkatiri iha HNGV Bidau,03/03/2025
Eis Primeiru Ministru ne’e hatutan infraestrutura iha setor saúde presiza hadia no fo akompanhamentu, iha fulan hirak ba kotuk iha problema ai-moruk maibe agora hatudu desenvolvimentu uituan maibe presiza haree didiak.
“Infraestruturas iha ospital presiza hadia no fo akompanhamentu didiak, ha’u haree mós fulan kotuk mai ohin, em termos ai-moruk balun iha ona, tratamentu mós halo ona, ha’u haree ho matan no sente, ita tenki rekunhese”.
“Ai-moruk sira ne’e ita tenki haree didiak, ha’u fo hanoin ba sira atu halo jestaun diak, ha’u haree iha desenvolvimentu uituan”. Alkatiri sublinha
Alkatiri konsidera jestaun no administrasaun Ministériu Saúde nian hatudu falla tanba ne’e presiza fo hanoin hodi hadia problema setor saúde iha Timor-Leste.
“Ha’u rona ema ne’ebe halo asistensia ne’e la servisu tanba la selu ema ne’ebe halo servisu, tanba sa mak la selu ema ne’ebe halo servisu vital tebes, ita tenki levanta ida ne’e, falla husi administrasaun, jestaun no Ministériu mai to’o kraik”.
“Ohin haree iha kaza mortuária, ha’u haree katak kahur malu sasan barak demais, ema mate baibain liu ba ne’eba lori ba uma, ema balun lori ba FORENSIK no restu mortais balun iha ne’eba hodi halo identifikasaun DNA maibe laiha kondisaun, ida ne’e ita tenki haree didiak”.
Alkatiri husu atu Restu Mortais sira tenki tau iha fatin ne’ebe dignu, “Restu mortais ne’e tenki tau iha fatin dignu, labele hanesan buat ida ke laiha valor, ohin loron herois nian ita tenki haree ba ida ne’e, ita tenki hadia”. Nia husu
Ligadu ho asuntu hirak ne’e, SAP News TL tenta halo komfirmasaun ho Diretor Hospital Nacional Guido Valadares (HNGV) maibe diretor refere laiha fatin.
Jornalista : Marciana da Conceição
