Pe. Cristóvão : Dala Barak Kria “Inimigu Ba Malu Tanba Ita Hein De’it ‘Deskulpa’ Hosi Ema Seluk”

Imajem : Padre Vigáriu Paróquia Sagradu Coração de Jesus Oesilo Padre Cristóvão Haron. Foto : SAPNews

Sapnews Pro : Amu Vigáriu Paróquia Sagradu Coração de Jesus Oesilo Padre Cristóvão Haron hateten dala ruma ema haree malu la di’ak no sai inimigu ba malu tanba hein de’it ema seluk mak husu uluk deskulpa.

Padre Cristóvão Haron saran lia hirak ne’e ba Sarani Estasaun Misionáriu Santo António de Padua Oelbamba’i, Paróquia Sagradu Coração De Jesus Oesilo, 02 Abril 2026

“Inan Virgem Maria liu husi nia oan mane Jesus kristu ne’ebe hadomi teb-tebes ita to’o fo a’an tomak ba mate, maromak domin na’in ne’ebe sempre hadomi ita, nia domin bo’ot”.

“Nune’e ita buka de’it atu responde ninia domin ne’e, ida mak domin divinu ka domin lalehan nian ne’ebe nunka pasiva maibé sempre ativu atu hahú no inisiativu halo buat di’ak ba ita ema”. Hateten Padre Cristóvão Haron.

Padre selebrante ne’e hatutan, dala barak problema ne’ebe hasoru iha ita-nia moris hamutuk iha komunidade no uma laran, “akontese tamba komunidade, familia no uma laran eh ema seluk atu mai hadomi ita”.

“Dala ruma ita haree malu la di’ak sai inimigu ba malu ho ema seluk ka viziñu sira, tamba ita hein de’it ema seluk mak husu uluk deskulpa, ita hein ema seluk mak mai tesi lia, la’os inisiativa no fo komprimentu husi ita mak husu deskulpa uluk, domin divinu lalehan nian la halo hanesan ne’e”. Nia sublinha

Ema ne’ebe nakonu ho domin divinu lalehan nian, nia sempre hola inisiativa atu hahú halo di’ak buat ida. Santa Terezinha menino Jesus dehan ema ne’ebe nakonu espiritu domin divinu lalehan nian, la hatene hapara atividades, la hatene atu nonok de’it.

“Ema sira hanesan ne’e sempre buka atu hadomi nafatin tamba sira simu kbi’it domin rohan laek husi husi Maromak rasik. Ita ema nia domin ne’e dala barak la satisfeitu, ita ema nia domin limitadu no dala barak lori difikuldade barak, tamba ita nia domin iha baliza tempu no fatin”. Nia haktuir

Na’i Lulik ne’e dehan, “Maromak nia domin iha estabilidade nafatin mai ita, maromak nia domin ba ita la iha baliza no fatin, nia domin fo nafatin ba ita to’o moris rohan laek”.

“Nia domin sempre habelar ba fatin hotu-hotu iha mundu tomak, nia domin la hatene distánsia do’ok ka besik, ema ne’ebe do’ok sei besik, ema ne’ebe besik sei la la’o do’ok tan ona husi nai maromak”.

Bibi atan ne’e akresenta sarani diak la’os hanesan domin apostolu Judas Iskariotes nian ne’ebe “dekat di mata ada Yesus tapi jauh di hadi tidak ada Yesus” ida ne’e mak domin husi karakteristika husi Judas Iskariotes nian.

“Ita ema liu-liu ba kabe na’in sira dala barak ita hamutuk, ita parseiru no parseira iha uma kain ida, maibé ita-nia hanoin iha fatin seluk, ida mak karakteristika husi Judas Iskariotes nian”.

Entretantu, iha selebrasaun misa kinta-feira Santa tinan 2026 iha Estasaun Misionáriu Santo António de Padua Oelbamba’i Paróquia Sagradu Coração de Jesus Oesilo Oé-cusse Ambeno hetan partisipasaun maksimu husi intelektual no sarani bairo Kuafe’u.