MDRHC Fasilita Povo Reativa Natar Ne’ebé Abandona Durante Tinan 19-32 Iha Luro, Produsaun Hahú Aumenta
Imajem : Komunidade halai natar iha Luro, 10/04/2026.
SAPNewsTL, Lautem: Ministériu Desenvolvimentu Rural & Habitasaun Komunitária (MDRHC sigla Português) liu hosi programa revitalizasaun komunitaria fasilita komunidade reativa hikas natar barak ne’ebe abandona kuaze tinan 32 no hasa’e produsaun agríkola iha área rural.
Natar na’in Norberto Camões hateten liu hosi apoia governu konsege fasilita komunidade reativa natar ne’ebe husik tinan 32, hafoin mak reativa fali iha tinan 2026.
“Ami-nia natar ne’e tinan barak ami la halo, natar ne’e uluk ami sei kiik mak ami-nia inan aman sira halo natar ne’e hodi fo han ami, maibe abandona ona kuaze tinan tolunulu resin rua ona (32), ami husik iha tinan 1993 no reativa iha tinan 2026”.
“Wainhira ami mai haree natar ne’e haree la iha vontade no la iha forsa atu halo tanba uluk ne’e uza de’it karau hodi halai natar maibe agora karau laiha ona no nia irrigasaun sira uluk diak maibe agora estragus hotu ona”.Dehan Norberto Camões iha natar Metiperehopan Suku Luro, Postu Administrativu Luro Munisípiu Lautem, 10/04/2026
Camões hatutan, natar ne’e hanesan ai-laran tuan ida ne’ebe nakonu ho ai hun bo’ot no nakonu ho du’ut ne’ebe susar tebes ba ami atu reativa maibe agradese tanba guvernu bele apoiu, nune’e ohin ami reativa ona”. Tenik Nia
Natar nain ne’e sente kontente tanba ho orsamentu sira ne’ebe transfere ba sira-nia Aldeia liu husi programa revitalizasaun komunitaria husi Ministeriu Dezenvolvimentu Rural no Habitasaun Komunitaria bele apoiu sira ho fasilidade no reativa sira-nia natar.
“Sente kontente tebes tanba ami bele reativa ona ami-nia natar ne’ebe hetan apoiu husi Ministeriu Dezenvolvimentu Rural hodi bele oferese hand traktor no polypipe, nune’e ami bele kanaliza ba natar”. Katak nia
Iha sorin seluk, Lino Soares agradese ba Ministerio Dezenvolvimentu Rural no Habitasaun Komunitaria tanba bele oferese makina hodi bele halo sira-nia natar ne’ebe abandona tinan barak.
“Ha’u agradese tanba ohin ami bele halo fila fali atividade agrikultura, natar ne’e husik iha tinan 1977 hanesan ne’e no ohin tinan ida ne’e mak ami foin halo fali, ami sente kontente ho programa Ministeriu ida ne’e nian tanba bele fasilita ami ho makina sira”. Lino agradese
Tomas dos Santos agradese tebes tanba guvernu bele transfere osan ba sira-nia Aldeia (40.000-50.000 kada aldeia), nune’e bele apoiu sira hola makina hand traktor no reativa ne’ebe abandonadu.
“Natar ne’e ami husik ona kuaze tinan sanulu resin ualu, desde tinan 2007, foin mak ami reativa fali, natar ne’e haree deit mós la iha vontade atu reativa, ami-nia avó sira halo kontinua mai ami inan aman sira no ohin mak ami kontinua”.
“Ha’u agradese tebes tanba governu bele aloka osan mai iha ami-nia Aldeia Abere, ami bele asesu hodi bele hola hand traktor sira hodi fasilita, makina hand traktor ne’e mak la iha karik ami seidauk bele reativa”.Tomas agradese
Postu Administrativu Luro tama iha programa ba programa revitalizasaun komunitária, nune’e governu konsege fasilita komunidade iha atividade sira hanesan Hortikultura (kuda modo), Agrikultura (to’os no natar), Pekuária (hakiak fahi, manu no karau), karpintária no komérsiu.
Tuir dadus ne’ebe SAPNews asesu liu husi Brigada MDRHC iha Aldeia Abere haktuir katak komunidade Aldeia Abere iha natar hektare 55,56, iha ne’ebe area kultivu iha tinan 2024 kuaze hektare 10,97 no abandona hektare 44,59 maibe husi tinan 2025 to’o 2026 konsege reativa hikas besik hektare 20. Nune’e natar ne’ebe abandonadu sei iha hektare 20 resin
