Papa Deklara La Ta’uk Trump ! Leão XIV : “Ha’u Haklaken Evangelhu & Kontra Funu”.

SAPNewsTL, Internasionál : Ligadu ho atake Presidente Estados Unidos América Donald Trump ba Santu Padre, Leão XIV hatan katak nia parte la ta’uk administrasaun Trump nian, nia kontinua kontra funu no lakohi tama ba debate.

Wainhira jornalista husu kona-ba kritika husi Prezidente Donald Trump, Papa responde diretamente: “Ha’u lakohi tama iha debate. Mensajen ha’u nian mak Evanjéliu no ha’u kontinua ko’alia ho firmeza hasoru guerra.”

Leão XIV fundamenta, nia parte la’os polítiku ne’ebe halo polítika maibe foku ba haklaken evangelhu.

“Ha’u la haree papel ha’u nian hanesan polítiku ida, ha’u la’ós polítiku, ha’u la hakarak tama iha debate ho nia.” Pontífise mos hatete katak, “Ha’u la hanoin katak mensajen Evanjéliu tenke uza ho forma sala, hanesan ema balu halo daudaun.”

Papa reafirma nia pozisaun katak nia kontinua promove diálogu, paz, multilateral no kontra funu.

“Ha’u kontinua ko’alia ho forsa hasoru guerra, buka promove dame, enkoraja diálogu no multilateralizmu entre Estadu sira atu hetan solusaun ba problema sira.”

Nia sublinha, “Ema barak mak sofre daudaun, inosente barak mak mate ona no ha’u fiar katak iha ema ruma tenke hamriik atu hatete katak iha dalan ida ne’ebé di’ak liu.”

“Dame. Ha’u hatete ida ne’e ba lider mundu tomak, la’ós de’it ba nia: mai ita hakotu guerra sira no promove dame no rekonsiliasaun.”

Wainhira husu fali husi jornalista Amerikana ida, Papa reafirma: “Ha’u la tauk administrasaun Trump. Ha’u sei kontinua ko’alia ho lian aas kona-ba mensajen Evanjéliu, ne’ebé Igreja servisu ba.”

Nia dehan tan, “Ami la’ós polítiku sira, ami la haree politika externa ho perspetiva hanesan sira. Maibé ami fiar ba mensajen Evanjéliu hanesan konstrutor dame.”

Papa Leão XIV saran lia hirak ne’e wainhira halo viajen ne’e dahuluk ba Kontinente África.
“Ne’e viajen espesiál ida, ida ne’ebé ha’u hakarak halo dahuluk. Oportunidade importante tebes atu promove rekonsiliasaun no respeitu entre povu sira.”

Antes ne’e, Presidente EUA atake Papa Leão XIV katak nia fraku kona-ba krime no polítika externa. Donald Trump lakohi Papa ida ne’ebe halo kritika ba asaun ne’ebe América halo hasoru Venezuela no Iraun.

“Papa Leo fraku kona-ba krimi, no la di’ak iha politika estranjeiru. Nia koalia kona-ba “ta’uk” husi Administrasaun Trump, maibé la mensiona ta’uk ne’ebé Igreja Katólika no organizasaun Kristaun sira seluk hasoru durante COVID, bainhira padre sira, ministru sira no ema seluk hotu hetan prizaun tanba halo servisu igreja”. Hakerek Presidente EUA Trump liu hosi nia kanal ofisial, 14/04/2026.

Trump deklara nia parte la gosta Papa Leão XIV, “Ha’u gosta liu nia alin Louis duké nia, tanba Louis suporta MAGA. Nia kompriende, maibé Leo la kompriende! Ha’u la hakarak Papa ida ne’ebé hanoin katak di’ak ba Iran atu iha arma nukleár”.

Presidente EUA ne’e sublinha nia parte lakohi Papa ida ne’ebe dehan sala kona ba América nia atake ba Venezuela.

“Ha’u lakohi Papa ida ne’ebé hanoin katak sala bainhira Amerika ataka Venezuela, nasaun ida ne’ebé haruka droga barak ba Estadu Unidu no, liu tan, halo prizaun sira sai mamuk hodi haruka kriminozu sira, inklui ohodor sira, trafika droga no kriminozu sira mai ita-nia nasaun”. Nia sublinha

Donald hatutan, “ha’u lakohi Papa ida ne’ebé kritika Prezidenti Estadu Unidu tanba ha’u halo buat loos ne’ebé povu hili ha’u ba ho vitoria boot hodi reduz krimi to’o nivel ki’ik liu no kria merkadu asaun (stock market) ne’ebé boot liu iha istória”.

“Leo tenki agradese, tanba hanesan ema hotu hatene, nia eleisaun nu’udar surpreza boot. Nia la iha iha lista ruma atu sai Papa, no Igreja hili nia tanba nia Amerikanu, no sira hanoin ne’e sei ajuda sira ho Prezidenti Donald J. Trump. Se la iha ha’u iha Casa Branca, Leo la iha iha Vatican”. Nia deklara

Trump dehan tan, “Infelismente, Leo fraku kona-ba krimi no arma nukleár, ne’ebé la agradavel ba ha’u. Nune’e mos ho faktu katak nia hasoru malu ho ema simpatizante Barack Obama hanesan David Axelrod, ema esquerda ida ne’ebé hakarak atu kadeia ema ne’ebé ba igreja”.

“Leo tenki hadia nia an hanesan Papa, uza sentidu komun, para de’it apoia esquerda radikal, no foka atu sai Papa di’ak, la’ós polítiku. Ida ne’e estraga nia, no liu-liu estraga Igreja Katólika”. Hakotu Prezidenti Donald J. Trump

Foto: Donald Trump & Vatican News