Ekipa Konjunta Suspende Buka Tuir Joel & Konsidera Lakon Ona ! Embaixada Agradese Ba Ekipa
Imajem: Ekipa Konjunta buka tuir Joel Asa ne’ebe lakon iha tasi. Foto : Media Australia
SAPNewsTL, Internasionál : Embaixada Timor-Leste iha Austrália agradese ba ekipa konjunta salvamentu ne’ebe buka tuir Joel Assa ne’ebe lakon iha Coffs Harbour, Austrália. Maske deside halo ona suspensaun ba buka tuir.
“Ami hato’o agradese boot tebes ba servisu emerjénsia hotu ne’ebé partisipa iha buka loron tolu ba Joel Asa ne’ebé lakon iha tasi, bainhira nia halai peska iha Emerald Beach iha loron 6 Abril”.
“Agradese tebes ba dedikasaun, koordenasaun no profesionalismu ne’ebé hatudu husi ekipa hotu-hotu (ró no elikópteru). Ami mos sente kontente atu simu informasaun direta husi polísia ne’ebé ajuda ami kompriende kle’an liu kona-ba eskala operasaun ne’e”. Segundu Página Oficial Embassy Timor-Leste of Austrália. 13/04/2026.
Tuir orientasaun husi peritu sira, oras ne’e suspende ona atividade buka tuir & konsidera hanesan Joel lakon ona.
“Polísia sei prepara relatoriu ida ba Tribunal Koroner Estadu no prosesu ne’e bele to’o fulan sia (Abril-Dezembru). Maski ida ne’e fo susar boot ba ami hotu, ami apresia katak ekipa Surf Life Saving sei kontinua halo monitorizasaun durante sira-nia operasaun regular”.
Joel lakon ka mate husik hela nia feen ida no oan ki’ik rua, “ami hamutuk ho família sira iha tempu difísil ida ne’e. Obrigadu ba ema hotu ne’ebé servisu iha tasi, iha aero no iha rai. Ita boot sira-nia esforsu signifikadu tebes ba komunidade Timoroa. Favor ida, kontinua hatudu ita-nia hanoin no orasaun ba nia família”.
Traballador timoroan Joel Assa ho idade 31 mout iha Tasi Emerald Beach Coffs Harbour New South Wales, 06 Abril 2026, wainhira ho kolega ba kail-ikan.
Tuir publikasaun ne’ebe fo sai husi ID Facebook Ana M. Gondinho haktuir katak sira ho ekipa konjunta buka tuir timoroan ne’e desde lakon no mout iha Tasi.
“Ami buka tuir hela kolega timoroan ida ne’ebe monu iha Tasi Emerald Beach Coffs Harbour New South Wales, Austrália”. Haktuir timoroan Ana M. Gondinho iha fatin akontesimentu, 06/04/2026.
Traballador, Agusto Soares, haktuir Joel ho kolega nain 2 ba hakail iha tuku 6pm. Laloran tasi baku, Joel Assa, monu ba tasi laran no lakon to’o agora. “Ita hotu reza no tau fiar Milagre Maromak nian. Atu nune’e bele hetan Joel”.
Timoroan ne’e mout wainhira ba kail ikan iha Tasi Emerald Beach Coffs Harbour New South Wales, Austrália, vítima ne’e ho naran inisial Joel Assa no orijem hosi Suku Afaloikai, postu administrativu Uatulari, munisipiu Viqueque.
Tuir informasaun ne’ebe SAPNews asesu hatudu katak ekipa konjunta ho Elikópteru no Ró suspende ona atividade buka tuir traballador timoroan ne’e no prepara relatóriu hodi aprensenta.
