Brazil & Guine Equatorial La partisipa, TL Vs Portugal Iha Jogu Abertura CPLP

Imagem : Reprezentante komisaun organizador João Rodrigues iha edifisiu MJDAC Lecidere, Dili tersa (01/07/2025).

SAPNewsTL, Dili: Timor-Leste sei kontra Portugal iha jogu abertura CPLP 2025 iha Estadium Munisipal Dili loron 19 fulan jullu 2025, enkuantu Brazil no Guine Equatorial la partisipa jogu ne’e.

Augusto dos Santos – SAPNewsTL

“Ohin, ita enkontru ho federasaun sira atu informa orariu jogu sira nian, nune’e jogu abertura jogu CPLP 2025 Timor-Leste sei kontra Portugal husi modalidade futebol iha Estadium Munisipal Dili, enkuantu halo abertura ba jogu CPLP 2025 iha loron 19 fulan jullu 2025”. Hateten Reprezentante komisaun organizador João Rodrigues ba jornalista sira iha edifisiu MJDAC Lecidere, Dili tersa (01/07/2025).

João hatutan, loron rejistrasaun ho plataforma online ba delegasaun sira husi nasaun 9 iha CPLP taka ona iha loron 30 fulan junu 2025, nune’e nasaun sira halo rejistrasaun mak Cabo Verde, Angola, Guine Bissau, São Tome e Principe, Moçambique, Timor-Leste no Portugal.

Infelizmente nasaun Brazil la konsege halo rejistrasaun no Guine Equatorial halo tiha rejistarsaun maibe to’o ikus sira la informa sira nia partisipasaun, entaun nasaun rua ne’e sei la mai kompete jogu iha Timor-Leste.

Delegasaun husi nasaun hitu, Cabo Verde, Angola, Guine Bissau, São Tome e Principe, Moçambique, Timor-Leste no Portugal hamutuk nain-512 husi modaliudade futebol, tenis kampu, basketebol, voleibol, xadres, taekwondo, karate no atletizmu mak sei partisipa jogu CPLP 2025.