ChildFund Identifika Programa KFFL-Lautem
SAPNewsTL, Lautem: Ajénsia ChildFund Timor Leste hala’o identifikasaun ba programa organizasaun Juvenil Klibur Foinsa’e Fini Luro (KFFL) iha Munisipiu Lautem Postu Administrativu Luro.
Iha entrevista ho Youth Field Officer Martinho da Silva haktuir organizasaun ChildFund prezensa iha sentru Organizasaun Juvenil Klibur Foinsa’e Fini Luro atu halo identifikasaun ba aktividade sira ne’ebe grupu juventude sira hala’o durante ne’e.
“Ohin mai iha Organizasaun Juvenil Klibur Foinsa’e Fini Luro atu halo identifikasaun ba KFFL ne’ebe mak sai hanesan grupu voluntariu iha Postu Luro inklui grupu juventude hirak ne’ebe eziste iha Munisipiu Lautem”. Dehan Youth Field Officer Martinho da Silva iha sentru organizasan juvenil KFFL Mahira-Luro, Tersa-Feira, 12/03/2024
Martinho observa Klibur Foinsa’e Fini Luro iha espíritu voluntarismu hodi transmite nia esperiensia ba nia maluk juventude maske hasoru dezafiu no rekursu ne’ebe la sufisiente.
“Ami haree katak Klibur Foinsa’e Fini Luro maske sira iha rekursu ne’ebe menus liu dezafiu barak mak sira enfrenta maibe la taka dalan ba sira nia espíritu voluntarismu tanba juventude barak ne’ebe maka ho voluntarismu bele espalha fali sira nia matenek no esperensia ne’ebe sira iha ba fali maluk juventude sira seluk ne’ebe mak hakarak atu aprende iha sira nia grupu refere”. Tenik Martinho
Joven Potensial husi ChildFund ne’e informa sei servisu hamutuk ho KFFL iha area kapasitasaun juventude hodi eleva sira nia kuñesimentu no dezenvolve liu tan sira nia organizasaun juvenil ne’e ba oin.
“ChildFund sei servisu hamutuk ho KFFL no oinsa mak ChildFund bele suporta sira liu husi kapasitasaun ba grupu juventude sira liu-liu ba iha lider juventude sira ne’ebe mak iha, nune’e sira bele hasa’e sira nia kuiñesimentu no dezenvolve sira nia organizasaun juventude refere hodi ba oin”. Nia Salienta
Ofisial Martinho haklean, “programa ne’e hala’o ona iha Munisipiu Lautem liu-liu ba Postu tolu mak hanesan Postu Lautem, Postu Luro no Lospalos, ami identifika ona grupu juventude ne’ebe hamutuk ruanulu resin tolu iha Lautem”. Nia salienta
Iha fatin hanesan, Prezidente Klibur Foinsa’e Fini Luro Jorge Alves da Costa agradese tanba ChildFund bele rekuñese sira nia organizasaun hodi prezensa iha sira nia fatin hodi halo identifikasaun ba sira nia programa.
“Ami agradese, kontente no orgullu tanba ChildFund bele rekuñese ami nia organizasaun juvenil ida ne’e hodi to’o mai iha ami nia fatin, halo asesmentu ba aktividade ne’ebe KFFL halo no sira mos aprezenta sira nia aktividade sira, oinsa ami nia ekipa mos bele hetan entaun ohin sira aprezenta materia sira hanesan haforsa ekonomia, teatru, rezolusaun konflitu, balansu jéneru sira koalia kona-ba asuntu sira ne’e ekipa KFFL mos presiza”. Katak Jorge
Jorge mos hein katak ba futuru sei nafatin servisu hamutuk ho ChildFund iha parte kapasitasaun juventude nian hodi hasa’e kunesimentu juventude sira nian iha Postu Luro no Munisipiu Lautem.
“Ami espera ba oin sei servisu hamutuk diak liu tan liga liu ba kapasitasaun juventude ho materia ne’ebe ChildFund iha ona no mos materia balun ne’ebe husi organizasaun rasik ne’ebe hetan durante aprende iha fatin-fatin koko hodi eleva liu tan maluk joven sira nia kunesimentu”.
Enkuantu, Organizasaun ne’e hari’i husi foinsa’e sira iha loron 31 Fulan Dezembru 2018, ho vizaun atinje Luro ne’ebe matenek no hari’i Luro laiha obstákulu iha futuru liu husi formsaun, kapasitasaun no atividade extrakurtikuláriu sita
Jornalista: Luis Pailofo