CI Konsidera Aktu PNTL & SEATOU Ameasa Liberdade Imprensa

SAPNews TL, Díli – Instituisaun reguladora media nasiónal Conselho de Imprensa (CI sigla Portugues) konsidera aktuasaun Polisia Nasional Timor-Leste (PNTL) hasoru Jornalista Timoroan ida (1) no ekipa Sekretriu Estadu Asuntu Toponomia no Organizasaun Urbana (SEATOU) hadau ekipamentu jornalista nian, nu’udar aktu tentativa no ameasa hasoru liberdade imprensa iha pais demokrátiku.

Konselheira Conselho Imprensa Izabel Fernandes hateten, CI nu’udar instituisaun Independente Estadu nian neʼebé hala’o nia knaar importante sira tuir Lei Komunikasaun Sosiál, Artigu 44⁰ atu garante liberdade imprensa no liberdade espresaun, tanba ne’e CI lamenta ho atuasaun PNTL no ekipa SEATOU nian hasoru maluk Timoroan sira.

“Konsellu Imprensa iha ámbitu vizita Amu Papa nian, kontinua ezerse ninia mandatu hodi garante no promove liberdade imprensa, atu kanál midia no jornalista sira halo sira nia atividade jornalístika ho livre iha kontestu kobertura no publikasaun, ami husi Conselho de Imprensa senti lamenta ho atuasaun refere.” Dehan Konselheira CI Izabel Fernandes, ba jornalista sira lha Salaun CI Kintal Bo’ot, Quarta, (04/09/2024)

Konselheira Izabel Fernandes akresenta, presizamente, entidade sira estadu nian liuliu aparellu estadu nian hanesan PNTL tenki respeita midia no jornalista ninia servisu iha terrenu, tamba papel media nian importante tebes iha estadu direitu demokratiku, nune’e liu husi kobertura jornalista nian bele trasmite informasaun ne’ebe kredivel ba publiku.

“Ha’u hakarak hato’o ba kolega jornalista no públiku katak aktu detensaun hasoru jornalista Diligente Antonia Kartono Martins no aktu hadau jornalista Suzana Cardoso Jornalista ONE Timor husi autoridade seguransa bainhira halo kobertura ba prosesu eviksaun iha merkadu Comoro nu’udar aktu tentativa no ameasa hasoru liberdade imprensa iha Timor-Leste”. Nia preokupa

“Ita nia nasaun nu’udar pais demokrátiku, aktu ne’e la merese akontese tamba jornalista sira halo hela sira ninia papėl kontrolu sosial hodi garante dezenvolvimentu país nian tuir planu no programa, aktu ida-ne’e kontra momos Konstituisaun RDTL, Artigu 40⁰ no 41⁰ ne’ebé garante liberdade imprensa no informasaun lolos no kredivel sein impedimentu husi parte ne’ebé deit”. Nia sublinha

Aleinde ida- ne’e, aktu seguransa nian hodi detein jornalista hadau no estraga ekipamentu jornalista nian mós kontra Lei Komsos, Artigu 8 no 10 ne’ebé ko’alia kona-ba liberdade imprensa, liberdade informasaun no sensura. Nune’e, aktu seguransa nian ne’e mós konsidera nu’udar aktu sensura ba informasaun ne’ebé tuir lolos públiku tenke hetan nu’udar direitu báziku ema nian, maibé ida-ne’e la akontese.

Entretantu, tuir kronolojia husi akontesimentu iha loron tolu fulan setemebru foin lalais katak, bainhira nia parte hakbesik an ba vendedor sira hodi husu atu halo intervista, maka ekipa Polisia Nasional Timor-Leste (PNTL) liu husi eskuadra Dom Aleixo, nia membru sira tenta haruka jornalista refere atu hamate telefone ne’ebe nia utiliza hodi halo kobertura no halo obrigatoriamente haruka jornalista ne’e atu hamoos video ne’ebe grava ona.

“Bainhira ha’u hakbesik an ba vendedor sira hodi husu sira atu intervista kona-ba tamba saida mak polisia sira halo atuasaun, nune’e iha momentu ne’eba polisia sira hakbesik an mai ha’u sira dehan taka ita bo’ot nia telefone, maibe ha’u hatan ba sira dehan ha’u jornalista, maibe sira nafatin la fiar, husu ha’u nia kartaun media nian, entaun ha’u hatudu kartaun media ba sira maibe sira la fiar, sira dehan lori nia ba komandante, nune’e sira obriga ha’u haruka lori ba komandante hodi husu ha’u, sira ko’alia linguagen ne’ebe la favoravel no la adekuadu”. Konta Vitima Antonia Kartono Martins

Antonia Kartono Martins salienta, membru Polisia Nasional Timor-Leste sira tenta nafatin obriga nia hodi hamos video ne’ebe nia halo ona gravasaun, nune’e PNTL sira komunika ba nia ho linguajen ne’ebe koko atu insulta nia hodi ezije nia obrigatoriamente hakat ba eskuadru dom aleixo hodi halo klarifikasaun detalhu kona-ba akontesementu refere.

Iha fatin hanesan, Jornalista Media One Timor Suzana Cardoso klarika katak, iha loron tolu (3) fulan setembru iha Tersa kalan, mosu aktu tentativa hodi impede kobertura jornalista nian, bainhira jornalista Media One Timor hala’o kobertura iha area Kampung-Baru suku Comoro Postu Administyrativu Dom Aleixo Munisipiu Dili liga ba akontesementu entre ekipa SEATOU nian hatudu asaun brutalismu hasoru vendedor sira ne’ebe fa’an sira nia produtu iha area Kampun-Baru, nune’e sira obriga atu hamate telefone ne’ebe uza ba gavasaun video

“Kronolojia akontesemntu ne’e bainhira halo gravasaun video maun ida ko’alia ho lian makas mai hau hodi dehan hamate ita bo’ot nia kamera, nune’e ha’u hatan ba nia dehan hau jornalista, maibe nia nafatin bolu mai dehan favor ida hamate ita bo’ot nia kamera, entaun ha’u lembra fila fali ba kotuk militar Indonesia sira kaptura Timoroan, hafoin maun ida mai hadau ha’u nia kamera no hit atu soe ba rai, sira obriga lori ha’u ba Seketariu Estadu hodi haruka delete video ne’ebe ha’u halo antes ona”.

ligadu ho kazu ne’e, vitima na’in rua deklara ona katak sira nia parte sei kontinua lori ba tribunal hodi buka justisa tanba konsidera krime kontra lei komunikasaun sosial numeru 5/2014, 19 Novembru.

Jornalista : Dirsia Baptista Belo