Datuk : “Index Liberdade Imprensa TL Diak, Media Iha Malásia Kontrola Hosi Governu”.
Imajem : Vise Presidente Senadu Parlamentu Malásia Datuk Nur Jazlan Bin & Vise Ministru Asuntu Parlamentares Adérito Hugo iha Hotel Timor, 02/07/2025
SAP News – TV, Dili : Hafoin to’o Timor-Leste, Vise Presidente Senadu Parlamentu Malásia Datuk Nur Jazlan Bin Tan Sri Muhamad hala’o sorumutu ho lideransa orgaun komunikasaun sosial sira hodi ko’alia kona-ba liberdade imprensa, transparênsia parlamentar no integrasaun regional.
Marciana da Conceição – SAP News TL
Durante sorumutu, Vise Presidente Senadu Parlamentu Malásia Datuk Nur Jazlan hateten liberdade imprensa iha Timor-Leste diak tebes tanba garante kobertura livre, nakonu ho damen, no nia index prense top 10 iha tinan 2023 no top 20 iha 2024.
“Index liberdade imprensa Timor-Leste hetan ona top 10, hafoin tun fali ba top 20, ne’e hatudu katak index diak tebes tanba livre kobertura no nakonu ho damen, iha Malásia média kontrola hosi governu tanba problema relijiaun, problema oioin ne’ebe difisil no susar, entaun governu mak kontrola maibe iha Timor-Leste ne’e livre”. Hateten Vise Presidente Senadu Parlamentu Malásia Datuk Nur Jazlan durante enkontru iha Hotel Timor, 02/07/2025
Vise Presidente Senadu Parlamentu Malásia mós fo agradese ba governu no lideransa média sira tanba bele hasoru malu hodi fahe experiênsia no kunhesimentu ba malu liu hosi sorumutu ne’e.
Durante enkontru, Datuk Nur Jazlan Bin Tan Sri Muhamad mós sublinha ninia bem-vindu ba Timor-Leste tanba fulan tolu mai tan, Timor-Leste sai ona membru plenu ba ASEAN.
Vise Ministru Asuntu Parlamentar Adérito Hugo dehan Timor-Leste iha faze preparativu atu sai membru ba ASEAN, tanba ne’e nia interesante loos atu hasoru malu ho media nasional sira atu rona no fahe esperiensia.
“Posibilidade governu no estadu Malaysia bele tau atensaun ba setor media nian liu-liu oinsa jornalista sira bele halo kobertura ba asuntu ASEAN”.
“Sira moos hatene asuntu adezaun ba ASEAN ne’e laos deit formalidade maibe ne’e partisipasaun iha setor hotu-hotu. Setor hotu-hotu iha ita nia rai ne’e involve hotu tanba adezaun ne’e ba ho kompromisu, atu adere ba ASEAN ita tenke kompromete atu tama ba sistema no regra sira ne’ebe eziste iha komunidade ASEAN nian”. Hatete VMAP Adérito Hugo
Nune’e, sira haree iha fator importante maka oinsa posibilidade haree kooperasaun entre parlamentu Timor-Leste ho governu Malaysia hodi tau atensaun no posibilidade bele fo formasaun ba jornalista no media sira, oinsa kultura no ambiente iha organizasaun rezional ASEAN nian.
Adérito hatutan, “atinjimentu ba ita nia index ba liberdade imprensa avansadu liu pais sira iha mundu hanesan Australia no Indonézia, ita nia index ne’e pozitivu, refleta pais kiikoan ida ho nia prinsipiu fundamental ne’ebe introduz iha konstituisaun, ita komunga ida ne’e ho seriu tebtebes durante dekade rua 20 liu”.
Sorumutu ne’e partisipa hosi Konsellu Imprensa, Presidente RTTL E.P, Tatoli I.P, Diretor Mídia no Xefe Redasaun Mídia Nasional sira, representa media ofisial Parlamentu Nasional, Media Presidência da República, média membru governu no seluk tan.