Desenvolve Sistema No Jestaun Saúde, USAID Apoiu Millaun $ 15.6 Ba TL

SAPNewsTL DIL- Ministra Saude Dr. Odete Maria Freitas Belo, Diretora Interina Misaun USAID Dinah Zeltser, no Prezidente Funsaun Públika, Faustino Cardoso Gomes partisipa iha serimonia abertura semináriu nasionál iha Hotel Timor hodi finaliza esbosu deskrisaun servisu no avaliasaun dezempeñu ba professional saúde sira.

Tuir Presidente Funsaun Públiku Faustino Cardoso hateten Semináriu refere Partisipa husi 150 pessoas kompostu husi jestor no professional saude sira husi nivel nasional no munisipal, iha semináriu ne’e halo diskuzaun ba esbosu deskrisaun servisu 41 no evaluasaun dezempeñu servisu ne’ebe dezenvolve hamutuk husi Ministeriu Saude no USAID hodi desenvolve setor saude ba futuru

“Atu hametin setor saude ida ne’ebé efikaz, responsavél no transparente, liu husi servisu no evaluasaun desempeñu sei hametin politika no guiaun operasional sira ba rekrutamentu, retensaun, alokasaun no desempeñu funsionariu sira nian. Profesional Saúde sira sei hetan kompensasaun no evaluasaun tuir padraun difinidu, justu no iha dalan ne’ebé efetivu liu hodi ajuda Timor-Leste oferese servisu saude ida ho kualidade a’as no justu”. Tenik Prezidente Funsaun Publika Faustino Cardoso iha Hotel Timor, 19/10/2022

Tuir nia Kritériu ba deskrisaun servisu no avaliasaun desempeñu programadu sei implementa tinan oin, nune’e professional saúde sira Timor-Leste nian atu servisu ho sira nia deskrisaun servisu própriu no evaluasaun ba kompeténsia bazeia ba dezempeñu liga ho rezultadu no indikador programa sira no tarefa ne ebé sira hala’o.

Entretantu, Iha diskursu, Ministra Saúde, Odete Maria Freitas Belo parabeniza Diresaun Jeral Servisu Korporativus no Diresaun Nasional ba Rekursus Humanus tanba bele realiza avaliasaun dezenpenhu refere

“Parabens ba Diresaun Jeral Servisu Korporativus no Diresaun Nasional ba Rekursus Humanus, hamutuk ho USAID nia Atividade Ba Sustentabilidade Sistema Saude hodi bele realiza sesaun avaliasaun ida ne’e”. Dehan Ministra Odete

Governante ne’e konsidera Eventu ne’e importante tebes, atu diskute kona-ba deskrisaun servisu no evaluasaun dezempenhu, ida ne’e laos atu fo presaun ba servisu sira maibe atu fo oportunidade ba Ministeriu da Saude atu hadia desempenho servisu no sistema nasional saude nian, nune’e bele fornese kualidade servisu ne’ebe diak liu ba kliente no pasiente sira

Ministra ne’e garante liu husi sorumutu refere bele produz dokumentu ho kualidade ne’ebe hanesan baze legal hodi bele haforsa sistema saude iha Timor-Leste.

“Ha’u espera katak semináriu loron tolu ne’e sei halibur ideia, sujestaun no rekomendasaun husi Diretor sira, Xefe Departementu, Parseiru sira, Assosiasaun Professional sira, parseiru dezenvolvimentu sira no sosiedade sivil hodi finaliza esforsu sira ne’e”. nia sublinha

Iha fatin hanesan, Diretora Interina Misaun USAID Dinah Zeltser hateten estadus unidus iha komprimisiu hodi sai parseria ho ministériu saude hodi desenvolve setor saude iha Timor Leste

“Estadus Unidus iha kompromisu atu parseria ho Ministériu Saude hodi hari’i lideransa forte iha setor saude, sistema jestaun, kompetensia no abilidade ne ‘ebé krusial atu garante forsa traballu ida ne ‘ebé aksesivél, disponivel, aseitavél, kualidade a’as, ho dezempeñu diak iha setor saude.” Nia hatete

Enkuantu, Diretora ne’e konsidera Eventu ne’e parte ida husi USAID ninia Atividade ba Sustentabilidade Sistema Saude iha Timor-Leste, iha ne’ebe USAID Apoia ho total fundu millaun $15.6 ba periodu tinan ha’at (2020 2024), apoio ida ne’e atu hametin governasaun no finansiamentu iha setor saude, hadia advokasia sosiedade sivil sira nian no promove komportamentu saudavél iha nivel uma kain no komunidade.

Jornalista : Conzita Mota & Aqulina Taec

Editor        : Ekipa Editorial