Sorumutu Ho Liurai Cambodia, PR Horta : Kamboja Sai Alternativu Fornese Foos Ba TL
Imajen Presidente Republika Jose Ramos Horta audiénsia ho Liurai Reiñu Kambódia iha Palásiu Real, 20 Outubru 2022.
SAPNewsTL (Cambodia) : Prezidente Repúblika, José Ramos-Horta, Kuarta-Feira orseik, audiénsia ho Liurai Reiñu Kambódia, Narodom Sihamoni, iha sorumutu ne’e parte rua deskuti relasaun ekonómika no komersiál entre nasaun rua.
Tuir Presidente da Repúblika Jose Ramos Horta, Reinu Kambodia hanesan reinu antigu ne’ebe nia terus no luta hanesan ho Timor Leste
“Reinu Kambodia nu’udár Reinu antigu tebes, nia istória luta, terus mos hanesan ita, tanba ne’e, sira simpatia maka’as tebes-tebes. Ohin ko’alia ho Liurai nu’udár ema artista ida. Ohin, hanesan hakat ida husi diplomasia ho Kambódia ba tinan 20 nia laran”. tenik Xefe Estadu hafoin hasoru malu ho Liurai Kambódia iha Palásiu Real, 20 Outubru 2022.
Timor-Leste rejista avansu iha relasaun diplomátika, maibé presija aposta iha àrea komérsiu no ekonómiku.
“Ministériu Ekonomia, Komérsiu no Indústria hatene oinsa Timor-Leste sosa no importa foos husi Kambódia, bele karun oituan maibé kualidade di’ák no garante fornesimentu alternativu tanbá dala ruma iha krize bo’ot ruma, Vietname mós la konsege halo explortasaun ba ita, ne’e duni, Timor tenke diversifika rai ne’ebé importa foos nu’udár alimentu importante ba povu”. Sublinha Xefe Estadu.
Enkontru ne’e mos ko’alia mós kona-ba adezaun ba ASEAN, portantu, Kambódia apoia adezaun Timor-Leste nia integrasaun ba organizasaun rejionál ne’e iha tinan 2023.
Entretantu, Xefe Estadu ne’e mós konvida Liurai Kambódia, Narodom Sihamoni atu vizita Timor-Leste.
“Buka mos investimentu ho setór privadu nasionál no internasionál bazeia iha Kambódia, buka sira nia investimentu iha área agrikultura no turízmu iha Timor-Leste. Primeiru-Ministru Hun Sen vizita ona Timor-Leste, ohin ha’u konvida mos Sua Majestade, Liurai Kambódia atu vizita Timor-Leste no Nia simu ho laran konvite ne’e” informa Xefe Estadu.
Enkuantu, Timor-Leste no Kambódia sei asina akordu kona-ba servisu aereo, hodi permite voo mensal husi Phnom Penh mai Díli, hodi fasilita passajeiru husi Xina mai Timor-Leste, tanba paíz ne’e jeográfikamente besik liu Xina.
Tuir horáriu, Xefe Estadu sei hasoru malu mós ho senadu Reiñu Kambódia, entidade militár, setór privadu no alta entidade seluk iha Kambodia.
Jornalista : Vensensius Saldanha