Diak Liu Resigna An ! MDH Konsidera SEATOU Hatudu Brutalismu & Inkapasidade

SAPNews TL, Díli – Movimento Diretus Humanos (MDH) nu’udar estudante ativista ba direitu humanus no justisa sosial iha Asia Justice and right (Ajar, sigla English), lamenta ho aktu ne’ebe ekipa Sekretariu Estadu Asuntu Toponomia no Organizasaun Urbana (SEATOU), hala’o intervensaun direita ba vendedor sira iha area Kampung-Baru suku Comoro Postu Administrativu Dom Aleixo Munisipiu Dili

Tuir Portavós Ivon Baisaret hateten, aktu ne’ebe Govenu lidera husi Secretariu Estado Asuntu Toponomia no Organizasaun Urbana hamutuk ho ekipa Jestaun merkadu estraga no harahun produtu ne’ebe vendedor sira fa’an hodi sustenta familia, tamba ne’e MDH konsidera asaun refere nu’udar anti-povu hodi limita no hatauk povu atu hala’o atividade negosiu hodi buka moris no fó risku ba vendedor sira sai vuneravel.

“Ami hanoin katak govemu ne’e iha kbiit no obrigasaun atu hakonu direitu povu nian no trata povu ho dignu nu’udar Timor oan, maibe infelismente situasaun orseik(03/09/2024) hatudu governu liu husi SEATOU trata nia povo hanesan los animal”.Dehan porta voz Ivon Baisaret ba Jornalista sira iha salaun HAK, Quarta-feira(04/09/2024)

Centro Haburas Movimento direitos umanus ezije ba SEATOU ne’ebe lidera husi Germano Santa Brites Dias atu rejigna a’an tanba sira sente katak aktu SEATOU ne’e premanismu no militarismu hodi halo povu terus.

“Husu Secretariu Estadu Asunto Toponimia organizasaun urbana ne’ebe laiha kapasidade diak liu rejiga a’an hodi evita haterus povu maubere. Ami koondena Lider ho karakter premanismu, milterismu iha estadu Direitu Demokratiku”

Sira husu ba reprezentante povu iha uma fukun Parlamentu Nasional, Provedór dos Direitos Humanos e Justisa no Primeiro Ministru Kayrala Xanana Gusmão atu bele fo hanoin ba governu nune’e iha aproximasaun pressuasivu ba komunidade negosiante sira ne’ebé buka moris iha dalan ninin.

“Husu ba PDHJ hanesan Instituisaun uniku ba defensor Direitus Umanus iha Timor-Leste ne’ebe iha kna’ar bo’ot atu proteje sidadaun sira ne’ebe nia direitu violadu iha rai laran no husu Kayrala Xanana Gusmão kualidade hanesan Primeru Ministru fo atensaun ba aktu ne’ebé SEATOU halo iha terenu hasoru negosiante sira”.nia husu

Enkuantu sira husu ba parte relijiozu sira atu labele nonok iha situasaun ne’ebe sarani sira hasoru hela terus no sofrimentu oi-oin kauza husi inkapasidade ukun, sira husu ba universitariu hotu ne’ebé eziste iha Timor-Leste atu la bele dukur ba problema sosial ne’ebé maka povu maubere hasoru iha era ukun an.

“Ami sei kontinua ezize no hamutuk ho negosiante ambulante, vitima eviksaun wainhira la trata povu ho dignu no sem kria kondisaun ba sira, maka ami hakarak firme nafatin atu apoiu kondisaun ohin loron ne’ebé mak povu maubere infrenta iha estadu RDTL ida ne’e diferente ho slogan husi PM Kayrala Xanana Gusmão hateten katak “Povu Maka Funu, Povu Maka Terus, Povu Maka Heroi Bo’ot ba Ukun Rasik-An”.

Entretantu, movimentu direitus umanus hola nia pozisaun hodi kondena Sekretariu Estadu Germano Santa Dias Brites nia atuasaun no intervensaun hanesan aktu inkapasidade atu lidera SEATOU, nune’e movimentu husu ba Germano atu rejigna an husi nia kargu, tamba povu sai sofrimentu barak ona iha tempu okupasaun to’o ohin loron.

fo hanoin fali katak, antes ne’e (03/09/2024, tuku 7 kalan) SEATOU nia ekipa halo asaun brutal hasoru negosiante hodi sobu sasan negosiante nian no baku labarik ida iha kampun baru, inklui limite kobertura jornalista.

SEATOU Germano Dias Brites mos fo ona resposta katak lei fo dalan ba sira, hodi organiza no hadia sidade Dili sai moos, saudavel no organizadu, nune’e nia parte sei kontinua hala’o ninia knaar tuir mandatu hodi kontribui ba dezenvolvimentu nasional.

Jornalista : Dircia Baptista Belo & Guilhermino Ramos