Dojan Koni-TLS Prepara Atleta nain-55 Sei Kompete Iha Dragon Open 2022
Imajen intrevista treinador Rogez Varela Rodrigues iha Jinaziu Desportu Caicoli, Díli, Domingu, 25/09/2022
SAPNewsTL,Dili: Dojan Taekwondo Koni-TLS prepara ona atleta junior no senior hamutuk nain-55 kompete Dragon Open 2022 ne’ebé sei realiza husi Dojan Dragon-UNTL iha fulan Novembru tinan ne’e.
Tuir treinador Rogez Varela Rodrigues katak sira prepara ona atleta hamutuk nain-55 ba kompete no sira iha esperansa bo’ot sei manan iha Dragon open 2022 ne’e.
“Ami prepara ona atleta nain-55 husi kadet, junior no senior ne’ebé sei ba kompete iha Dragon Open 2022, ne’ebé ami iha esperansa atu manan iha dragon open maibé ami sei haree klase ba atleta sira ne’ebé komisaun organizador fo sai ne’ebé atleta sira husi Kadet, júnior no senior sei joga husi klase ida ne’ebe, nune’e ami bele prense atleta sira tuir komisaun organizador nia konvite mai ami”. Dehan treinador Rogez Varela Rodrigues ba jornalista sira iha Jinaziu Desportu Caicoli, Díli, Domingu, 25/09/2022.
Treinador ne’e hatutan, sira halo ona TC ( training camp) ba preparasaun Dragon Open 2022 ba atleta sira durante semana rua ona tanba simu ona orientasaun husi prezidente Dojan Koni-TLS nian para hamutuk ho asistente nain rua prepara atleta kompetisaun ne’e.
Entretantu, atleta júnior Zahara Menezes Lebra hatete,nia kontente no prontu kompete iha Dragon Open no iha esperansa sai manan nain iha eventu ne’e
“Ha’u kontente no prontu atu ba kompete iha Dragon Open 2022, ha’u nia esperansa sai manan nain dahuluk tanba treinu Taekwondo bele halo ita forsa hodi tuir kompetisaun hetan medalla no bele halo Timor Leste nia naran bo’ot ba futuru”. Tenik Atleta Zahara
Jornalista: Augusto dos Santos
Editor: Ekipa Editorial