Durante Mandatu, APA Zumalai Sei Prioritiza Infraestrutura Bázika
SAPNewsTL, Covalima : Hafoin simu pose iha fulan hirak liu ba, administradór postu administrativu Zumalai Alipio Magno liu husi via WhatsApp hateten, iha nia mandatu sei fo prioridade ba infraestrutura bázika hanesan estrada, bee mos no eletrisidade.
“Iha ha’u nia mandatu ida ne’e sei tau prioridade liu ba infraestrutura bazika, liu liu hanesan estrada, bee mos no eletrisidade. Ita fo prioridade ba estrada ne’e tanba komunidade Zumalai maioria moris nu’udar agrikultór, entaun ita nia servisu mak oinsa atu ko’alia ho governu sentral para hadia estrada sira ne’ebé difikulta movimentasaun komunidade nian hodi asesu estrada nune’e sira bele lori produtu lokal ba merkadu.”
Estrada sira ne’e mak hanesan, Zumalai liga Cassa Ainaro, Zumalai liga Bobonaro rua ne’e nu’udar estrada nasionál no seluk mak hanesan aldeia Ritiluli liga ba aldeia Pelet no suku Mape no Ucecai ba liu aldeia polo, suku Fatuleto liga ba aldeia Biata Pietama no aldeia Nala’Op, suku Lour liga ba aldeia Somo Knua no Salasa ba Taigiel, suku Tazhilin liga aldeia Kuluoan ba liu suku Raimea liga ba aldeia Beilaco no aldeia Oebaba ba SP1 no SP2.
Prioridade segundu kona-ba bee mos, ne’e hanesan nesesidade bazika ida ne’ebé komunidade presiza liuliu tempu bailoron tanba komunidade obrigadu tenke la’o de’it hodi ba buka be dok to’o mota, inklui husi suku ida ba suku seluk no aldeia ida ba aldeia seluk. Liu-liu komunidade sira hanesan hela iha Harekain, Oebaba, Beilaco, Leoriti, Raimea, Tazhilin, Galitaz no aldeia sira seluk tan iha parte foho ne’ebá.
Prioridade ba área Eletrisidade liu liu ba komunidade ne’ebé seidauk goja ukun an ida ne’e tanba durante sira ne’ebé hela iha area ne’eba estuda iha nakukun laran, nune’e difikulta los sira atu esduda ho di’ak iha tempu kalan. Komunidade ne’ebé seidauk asesu eletrisidade mak hanesan suku Fatuleto aldeia Biata, suku Lour aldeia Somo Knua no Pelet, no suku Raimea aldeia Oebaba SP1no SP2.
Entretantu, postu administrativu Zumalai lokaliza iha munisípiu Covalima ho nia luan área 283,74 km no total populasaun 16.104 tuir sensus uma kain 2022. enkuantu postu Zumalai iha potensialidade ba área agrikultura nian liu liu produsaun háre no batar, peskas no pekuária.
Purtantu, Postu Zumalai fronteira parte norte ho Bobonaro, súl tasi, oeste Suai no este Ainaro. Postu Zumalai kompostu husi suku 8 hanesan, Fatuleto, Lepo, Lour, Mape, Raimea, Tazhilin Ucecai no Zulo, no total aldeia hamutuk 35.
Jornalista : Marcela Lemos