Ekipa PR No IGE, I.P Kontinua Monitoriza Mota Laclo, Preokupa Natar Na’in La Fo Dalan

SAPNewsTL, Manatuto : Asessór Prinsipál Prezidénsia Repúblika, Tomás do Rosário Cabral akompañadu husi reprezentante Institutu Gestaun Ekipamentu Institutu Públiku-IGE. IP observa mota iha Postu Administrativu Laclo, Munisípiu Manatutu, hodi halo normalizasaun.

Korrente mota Laclo estraga natar no to’os komunidade nian iha loron 4 fulan Abril tinan 2021, hodi prejudika produsaun husi agrikultor sira durante tinan rua nia laran.

Segunda-feira foin lalais ne’e, Prezidente Repúblika, José Ramos-Horta, bolu ona Ministru Obras Públika, Abel Pires ho Prezidente IJE.I.P Ermenegilda Laurentina hodi halo normalizasaun ba mota Laclo no ida seluk iha aldeia Ilihuli suku Iliheu ne’ebé estraga hotu komunidade nia to’os no natar.

Xefe Ekipa Prezidénsia Repúblika, Júlio Gonçalves hateten, ekipa husi PR hamutuk ho IGE mai observa mota rua ne’e, tanba tuir orientasaun  Xefe Estadu, Ramos-Horta.

      “Hanesan enkontru semana rua liu ba katak, ekipa IJE mai ona halo “site visit”, ohin ita mai hamutuk ho ekipa IJE nian hodi haree atu bele ajuda normaliza fila fali, atu nune’e irrigasaun bele la’o di’ak, komunidade sira bele halo fila fali natar komunidade sira nafatin iha ai-han,” Júlio Gonçalves hateten, Manatuto, 09 Dezembru 2022

Reprezentante IGE, Egas Correia Lemos, haktuir entidade ne’e seidauk bele normaliza, tanba hetan pedidu humanitáriu barak, maske ajenda ona.

Normalizasaun ba mota rua refere, hasoru difikuldade tanba la iha Estrada atu destaka ekipamentu pezadu no entidade ne’e buka hela meius atu rezolve, tanba udan mos besik ona.

     “Mákina balun lori ona mai estasiona iha ne’e, atu hahú servisu, bainhira sira hahú servisu iha difikuldade oituan kona-ba ema nia natar ema la fó dalan, tanba dalan ne’e bá ami importante, haree iha mota Laclo sé ami lori kombustível ne’e susar boot ba ami. Maibé “não quer dizer” ami la halo la’e, ami prontu atu halo,” dehan Egas.

Xefe Suku Laicore Postu Administrativu Laclo Munisípiu Manatutu, Zeltino Tino do Rosário Cárcerres, husu Prezidente Repúblika, José Ramos-Horta atu reforsa no mantein komunikasaun ho IJE, nune’e normaliza mota refere.

     “Husu bá Prezidente-da-Repúblika bele reforsa nafatin bá IJE para normaliza mota ne’ebé sobu komunidade sira-nia natar, tanba durante tinan rua ona sira la halai natar no menus ai-han,” Xefe Suku Zeltino.

Autoridade lokál hato’o ona pedidu bá Administradór Munisípiu hodi husu IJE atu halo intervensaun hodi labele estraga irrigasaun ne’ebé kanaliza bee bá komunidade sira-nia natar, maibé eskavadór rua de’it ida avaria la konsege normaliza ikus mai bee sobu sira-nia natar kuaze ektares 150

Entretantu, tuir dadus ne’ebé iha, natar ne’ebé hetan estragus husi kalamidade públika 4 Abríl 2021 hamutuk aktár 9000.

Natar ne’ebé bee sobu husi suku 4 iha Postu Administrativu Laclo hamutuk natar hectare 3.500, suku Iliheu bairo Rembor hectare 1.500 no postu administrativu Manatutu Villa ho Obratu hamutuk hekare 4000.

To’o agora natar hirak ne’e kontinua abandona husi agrikultor sira, tanba governu liu husi IJE seidauk normaliza mota refere.

Jornalista : Vinsensius saldanha Morais De Araujo