Natar Hektar 500 Hetan Estragus, Familia 200 Simu Nesesidade Bázika
Imajne Komunidade Manatutu Vila no Laklo simu nesesidade baziku husi Presidensia da Republika, Manatutu, 09/12/2022. Foto : Media PR
SAPNewsTL, Manatuto : Prezidénsia Repúblika apoia nesesidade bázika ba familia atus rua iha Postu Administrativu Laclo no Postu Administrativu Manatutu. Apoiu ne’e kanaliza ba familia hirak ne’e, tanba tinan rua ona la halo produsaun, hafoin dezastres naturais estraga to’os no natar iha loron 4 fulan Abril tinan 2021.
Problema ne’e identifika husi Assesor Politiku Prezidénsia Repúblika, Tomás do Rosário Cabral, hafoin halo monitorizaun iha àrea Laclo no Manatutu Vila.
Nune’e, Prezidente Repúblika, José Ramos-Horta, orienta kedas ekipa hodi distribui ai-han nesesidade bázika sira-ne’e bá komunidade sira, hodi hein Institutu Jestaun no Ekipamentu Normaliza irrigasaun ne’ebe mak hetan estragus.
“Lori apoiu umanitáriu ne’ebé mak sua ekselénsia Prezidente entrega hela, ba sira iha área ne’e, tanba sira hetan afetadu husi dia 4 Abríl tinan rua liu bá, estraga natar barak tebes, irigasaun mós ladún la’o di’ak, komunidade sira uza de’it ai-han lokál ne’ebé iha hanesan akar,” hateten Xefe Ekipa Prezidénsia Repúblika, Júlio Gonçalves, Manatuto, 09 Dezembru 2022
Júlio hatutan, Prezidénsia Republika sei tulun mós komunidade iha àrea Bazartete, Munisipiu Liquiça, Bobonaro, Aileu no no Kolejiu Madre iha Postu Administrativu Soibada, Munisípiu Manatutu ne’ebe hasoru problema hanesan.
Sorin seluk, Xefe Suku Laicore Postu Administrativu Laclo Munisípiu Manatuto, Zeltino Tino do Rosário Cárcerres, agradese ba Xefe Estadu, Ramos-Horta, ne’ebé tulun komuidade sira, tanba tinan rua ona la halo to’os no natar.
“Nu’udar autoriedade Suku Laicore Postu Administrativu Laclo, ha’u agradese Gabinete Prezidente, tanba durante loron hirak husi Asessór Prinsipál mai halo monitorizasaun iha ami-nia suku, tanba durante inundasaun ami suku Laicore hasoru difikuldade bo’ot bé sa’e natar durante tinan rua ona komunidade sira la hetan hahán,” hateten Xefe Suku Laicore.
Imajen Komunidade Laklo Simu Ai-han husi asesor Presidensia Republika
Reprezentante Komunidade Afetadu, José Kai Soares sente kontente tanba bele hetan apoiu nessesidade bázika husi Prezidente Repúblika, José Ramos-Horta.
“Ami nu’udar komunidade Rembor, ami sente haksolok tebes, orgullu tebe-tebes no obrigadu barak bá na’i Prezidente ne’ebé fó apoiu fo’os, mina, supermi,” hateten José Kai.
Nia hatutan, durante ne’e povu agrikultor iha aldeia Ilihuli, Suku Iliheu Postu Administrativu Manatutu Villa hasoru difikuldade no han de’it akar, hafoin sira-nia natar kuaze ektares 500 resin hetan estragus husi mota.
Entretantu, apoiu ai-han bázika ne’ebé Prezidente Repúblika fó bá komunidade afetadu sira hanesan fo’os sakas 400, supermi dos 400 inklui mina bimoli lítru rua hamutuk 400.
Jornalista : Vinsensius saldanha Morais De Araujo