Embaixada China Sei Fasilita Jornalista Na’in 25 Tuir Programa Interkámbiu Iha Beijing
Imajem: Sekretariu Estadu Komunikasaun Sosial Expedito Loro Dias Ximenes iha Palasiu Guvernu, 21/05/2025. Foto: SAPNewsTL
SAPNewsTL, Dili : Sekretariu Estadu Komunikasaun Sosial (SEKOMS) hala’o enkontru urjénsia ho xefe redasaun no diretor informasaun husi media sira hodi fasilita jornalista na’in 25 tuir programa interkámbiu iha Beijing.
Marciana da Conceição – Sapnews Pro
Sekretariu Estadu Komunikasaun Sosial Expedito Loro Dias Ximenes hateten, jornalista nain ruanulu resin-lima sei tuir programa interkámbiu iha China, iha loron 16 fulan Jullu to’o loron 04 fulan Agostu.
”Governu servisu hamutuk ho embaixada China, nune’e sei haruka kolega jornalista 25 ba tuir formasaun hanesan interkambiu no tour jornalismu iha Beijing husi loron 16 de Julhu to’o loron 04 Agostu”. Dehan Sekretariu Estadu Komunikasaun Sosial Expedito Dias Ximenes ba jornalista sira iha Palasiu Guvernu, 21/05/2025.
SECOMS Expedito afirma, karta ne’ebé hato’o husi China ba SECOMS iha kriteriu ne’ebé ba deit diretor jeral, diretor infomasaun, xefe redasaun no editor ne’ebé iha nivel aas.
”Programa formasaun interkámbiu ne’e atu fahe esperensia ho media Timor-Leste nian ho media ne’ebe iha China, ne’e importante tebes maibe karta ne’ebe China hato’o mai SECOMS iha kriteriu, formasaun ne’e ba ema ne’ebé iha nivel aas iha media hanesan diretor jeral, diretor infomasaun, xefe redasaun no editor ba nivel a’as”. Nia subliña.
Iha karta ne’e mos hateten katak jornalista ne’ebé ba tuir formasaun interkámbiu tenke idade menus husi 45 mai kraik, maibe tenke hatene hakerek no ko’alia Inglés no ema ne’ebe tenke iha saúde di’ak, hakarak aprende no hatene fahe esperiénsia.
SECOMS akresenta embaixada China husu jornalista hamutuk ruanulu resin-lima maibe barak liu husi RTTL.E.P no Ajensia TATOLI, enkuantu plataforma online sei hili ida husi kada mídia.
”Sira husu jornalista husi RTTL no Ajensia TATOLI mak barak liu, sira seluk iha ida rua maibe engloba media hotu-hotu ne’ebé iha, karik kolega balun seidauk hetan sei iha oportunidade seluk tanba sira husu deit jornalista na’in 25″.
Tour jornalístiku ne’e sei responsabiliza husi embaixada China hanesan tikete, akomodasaun, transporte durante jornalista sira hala’o viajen no estadia iha Beijing, China.
Enkuantu, programa ne’e kontinuasaun husi vizita Prezidente Repúblika José Ramos-Horta ne’ebé akompanha husi Prezidente RTTL.E.P no TATOLI. I.P inklui SECOMS durante asina Memorandum of Understanding (MoU) ho grupu media China nian.
