![Empreza Distribuidór Sesta Bázika Seidauk Selu Agrikultór ! Komunidade Zumalai Prende Karreta Empreza Distribuidór Sesta Bázika Seidauk Selu Agrikultór ! Komunidade Zumalai Prende Karreta](https://sapnewstl.com/wp-content/uploads/2024/03/IMG-20240312-WA0000.jpg)
Empreza Distribuidór Sesta Bázika Seidauk Selu Agrikultór ! Komunidade Zumalai Prende Karreta
SAPNewsTL, Covalima : Relasiona ho programa sexta-bázika ne’ebe la’o iha tinan 2021-2023, Empreza CP Unipesoal Lda to’o ohin loron seidauk selu agrikultor suku Mape, Postu Zumalai Munisipiu Covalima nia osan hamutuk 36.220 dolares amerikanu.
“Ami agrikultór husi suku Mape postu administrativu Zumalai munisípiu Covalima hakarak hato’o ami nia ejizénsia hasoru empreza CP Unipesoal Lda ne’ebé deve ami nia produtu lokal husi 2021 to’o agora seidauk selu.”Tenik Benjamin da Silva liu husi via WhatsApp ba SAPNews iha Covalima, 11/03/2023
Porta voz agrikultor ne’e hatutan, iha tinan 2021 kompanha refere ba halo komunikasaun no halo kontratu hodi fo fornesimentu produtu lokal ba empreza, maibe hafoin programa ne’e remata kompanha seidauk halo pagamentu ba sira nia produtu 36.220 dolares.
“Iha momentu ne’ebá hafoin kompaña CP Unipesoal Lda manan tender ba distribuisaun sesta bázika, na’in ba kompaña señor Hermin Marino Soares kontaktu ami hodi halo kontratu konaba fornesimentu produtu lokal hanesan Fos ba ninia kompaña ho total tonelada 36.220 kg. Ami fornese fos hahu husi 2021 to’o 2023 Total osan ho montante USD 36.220, Maibé infelizmente to’o agora 2024 tama ona ba fulan marsu kompaña CP Unipesoal Lda seidauk halo pagamentu mai ami.”Nia informa
Komunidade sira halo ona kontaktu ba kompanha refere maibe infelismente nomor mate, nune’e komunidade sira labele halo buat ida.
“Ami kontaktu nia liu husi telephone,maibe ninia númeru mate hela deit no ami mos ba buka nia iha ninia uma Delta/Díli maibe nia la iha. Ami rona husi ninia Pai dehan nia ba rai liur mais la hatene tebes ou bosok.”Nia informa
Nune’e iha domingu kalan dia 3 marsu 2024, grupu agrikultór suku Mape postu administrativu Zumalai munisípiu Covalima prende ka hapara ona provizoriamente kompaña CP Unipesoal Lda ninia karreta fuso tronton ne’ebé tula loader husi Suai ba Díli iha bairro Harekain.
“Ami fo ultimatu katak, wainhira ami nia osan ne’e kompaña seidauk entrega mak ami sei la fo fila karreta fuso ne’e no sei fa’an karreta refere ba ema.
Tanba ne’e, liu husi média ida ne’e ami husu ba na’in kompaña CP Unipesoal señor Hermin Marino Soares tenke selu ona ho imediatamente ami nia tusan, ho montante osan USD 36.220 dólar molok ami fo fila karreta fuso tronton ne’ebé dadaun ne’e para hela iha bairro harekain.” Bemjamin da Silva deklara
Bemjamin da silva mos husu ba Parlamentu Nasional liu husi Deputadu sira atu bele buka solusaun ba preokupasaun ne’ebe komunidade sira hasoru.
“Ami mós husu ba nai ulun sira liu-liu reprezentante povu iha parlamentu nasional atu apoia ami hodi buka solusaun ba ami nia preokupasaun ida ne’e”.
Enkuantu, Jornalista SAPNews Timor-Leste mos tenta halo komfirmasaun ho na’in ba kompanha CP Unipesoal señor Hermin Marino Soares maibe seidauk iha resposta tanba nomor la ativu.
Jornalista : Marcela Lemos