Joana Konsidera Feto Barak Sai Obstákulu Ba Nia Feto Maluk
SAPNewsTL, Dili: Loron 8 Marsu nu’udar loron mundial ba feto, Jerente Komunikasaun Eksterna Telkomsel Joana Miranda Pereira hateten feto iha kapasidade hodi kompete, lidera no foti desizaun tanba ema hotu tenke promove no empodera feto Timor Leste hodi kontribui ba dezenvolvimentu nasaun.
Iha entrevista Jerente Komunikasaun Eksterna husi Telkomcel Joana Miranda Pereira haktuir tenke promove no empodera feto iha area oi-oin hodi kontribui ba dezenvolvevimentu nasaun nian.
“Loron 8 Marsu selebra lori mundial ba feto, parabens ba feto iha Mundu, parabens ba feto Timor Leste, tuir ha’u nia haree ita tenke promove feto no empodera ita nia feto maluk sira liu-liu joven feto sira tenke empodera sira iha area oi-oin, hanesan feto, kontente para atu empodera ami nia feto maluk sira seluk hodi bele kontribui ba iha dezenvolvevimento Timor Leste”. Dehan Jerente Komunikasaun Eksterna husi Telkomcel Joanina Miranda Pereira ba jornalista SAPNewsTL, 7/03/2024
Jerente Komunikasaun Eksterna husi Telkomcel ne’e hatutan feto barak mak iha kunesimentu no iha kapasidade maibe feto barak seidauk hetan oportunidade.
“Ita tenke promove feto iha setor hotu-hotu liu-liu setor privadu sira tanba feto potensial barak no feto ne’ebe iha kapasidade ba área oi-oin, barak maka hola parte ona iha konstrusaun estadu liliu iha area edukasaun, telekomunikasaun, saude no mos setor privadu sira feto maioria kuaze hola parte ona iha dezenvolvevimento nasional, feto mos bele sai lideransa no ikus mai iha poder atu foti dezisaun ne’ebe importante”. Tenik Joana
Joana afirma nu’udar feto ho selebrasaun loron mundial ba feto ida ne’e nia hanoin tenke promove partisipasaun feto iha aspetu hotu-hotu inklui mos defende igualidade jeneru maibe feto sira dalaruma la apoiu nia feto maluk sira seluk ne’ebe hetan oportunidade.
“Dezafiu bo’ot ne’ebe feto sira hasoru mak dala ruma feto rasik mak sai dezafiu ba nia feto maluk ida tanba dalaruma iha oportunidade atu promove ba feto sira, feto maluk sira la fo apoiu ba nia maluk atu la fiar hodi la’o ba oin maibe dala ruma desmoraliza”. Nia Salienta
Jerente Komunikasaun Joanina salienta, “Dalaruma ita dehan mane maka sai obstákulu ba feto dalaruma sira nia kaben maka la fo maibe lae ikus-ikus ne’e ita haree iha fatin barak feto maluk duni maka sai obstakulu bo’ot ba Nia feto maluk sira seluk, atu hakat hodi prenxe hanesan kargu ruma iha ministeiru ka iha setor privadu entaun feto mos hola parte no promove no tenke fo oportunidade labele ita feto sai fali obstaklu ba ita nia feto maluk sira”. Nia hatete
Jornalista: Ermelinda Soares