Engenharia Sivil UNTL, Fo Espasu Ba Finalista 68 Apresenta Rezultadu Peskija

Imajem : Entrevista Vise Diretor Departamentu Engenharia Sivil, UNTL Marcelo Marques iha Kampus Hera, 04/07/2024. Foto : Marciana Fernandes

SAPNewsTL, Dili – Vise Diretor Departamentu Engenharia Sivil Marcelo Marques haktuir finalista hamutuk 68 mak apresenta rezultadu peskija tanba sira sei tuir ezame monografia iha semana oin.

Finalista Departamentu Engenharia Sivil, Fakuldade Engenharia Siénsia no Teknolojia, Universidade Nasional Timor Lorosa’e hamutuk 68 apresenta banner monografia, molok tama ba ezame monogafia hodi finaliza estudu iha UNTL.

Vise Diretor Departamentu Engenharia Sivik Marcelo Marques hateten peskija ne’ebe estudante sira hala’o ne’e tuir seksaun ne’ebe kada estudante prefere, seksaun hirak ne’e mak hanesan teste material, survey kampu, dezenhu estrada, estrutura betaun, teste rai, bee, jestaun projetu inklui sira seluk.

“Peskija ne’e estudante sira fahe ba seksaun oioin tuir ida-idak nia preferensia, liliu area bee ninian, jestaun projetu, estrutura, estrada, peskiza ne’e tuir kada seksaun, no hakat ba material ne’e oinsa sira bele uza material lokal sira ne’e”.Tenik Vise Diretor Marcelo Marques ba SAPNewsTL iha kampus Hera, 04/07/2024

Vise Diretor ne’e informa estudante departamentu engenharia sivil ne’ebe partisipa iha apresentasaun banner monografia ne’e hamutuk neenulu resin ualu (68), estudante finalista hirak ne’e sei ezame monografia iha fulan ida ne’e.

“Estudante sira hamutuk 68, sira sei tuir ezame monografia iha fulan ne’e, ha’u hakarak husu ba estudante sira hotu hodi aprende nafatin hodi prepara an ba futuru, presiza dezenvolve an diak liu tan hodi hatan ba dejafiu sira iha oin tanba nasaun ne’e sei iha faze dezenvolvimentu”.

Imajem : Entrevista Diretor Departamentu Geologia no Petróleu, Apolinário Alves iha Kampus UNTL Hera, 04/07/2024. Foto : Marciana Fernandes

Iha fatin hanesan, Diretor Departamentu Geolojia no Petróleu Apolinário Alves haktuir molok estudante ida atu halo ezame monografia, normalmente sempre liu husi ezame proposta, hala’o peskija, prosesa dadus hafoin halo apresentasaun ba rezultadu peskija no ezame monografia.

“Prosesu final ne’ebe estudante sira halo ne’e bainhira atu hetan rezultadu ne’e tenke hatama uluk sira nia tópiku hodi hala’o ezame, bainhira ezaminador sira fo pasa hafoin sira tun ba halo peskiza, karik la pasa tenke hadia fila fali, hadia nia metodologia no teoria sira”.

“Prosesu aprendijajem ne’e la’o nafatin, estudante tenki aprende nafatin, hakaas an hodi dezenvolve ida-idak nia kapasidade

“Rezultadu agora ne’e husi sira nia peskiza rasik ne’ebe durante sira hala’o fulan neen iha kampu, depois sira fila fali hodi halo aprezentasaun, no antes sira halo aprezentasaun ba ezame final tenke aprezenta uluk rezultadu ne’e ba públiku, liu-liu ba nia kolega sira hodi hatudu fila fali rezultadu ne’e”. Tenik Diretor Departamentu/mmmppm,

Diretor Departamentu Geolojia no Petróleu Apolinário Alves sublinha, apresentador sira sempre responsabiliza ba sira nia dadus ne’ebe kolleta iha terenu, wainhira halo apresentasaun sira tenki hatene saida mak sira hakerek no halo bazeia ba sira nia projetu final.

“Bainhira ema sira ne’ebe mai akompaña husu perguntas, sira bele responde no responsavel ba peskiza ne’e ka lae, hafoin ba hasoru ezaminador sira hodi halo ezame final, bainhira ezame mak sira lahatene no la responsavel ba sira nia peskiza, signifika katak sira lahatene no ema seluk mak halo”.Apolinário sublinha

Diretor ne’e informa durante tinan 12 departamentu geolojia no petróleu ne’e hari’i, konsege produz ona graduadu hamutuk atus ida resin, agora sira barak hetan ona servisu iha institusaun estadu no instituisaun sira seluk.

Lider Departamentu ne’e husu ba estudante sira atu responsabiliza ba sira nia rezultadu peskija ne’ebe halo iha terenu hodi aplika iha loron aban bainrua, wainhira remata ona estudu iha mundu akadémiku.

“Ha’u husu ba estudante sira tenke responsabiliza ba sira nia peskiza tanba rezultadu husi ida ne’e hanesan bukae ida bainhira foti departamentu ida tenke hili material espesifiku ida no bainhira sai ba liur bele aplika liliu iha area Geolojia nian no aplika ho diak ida ne’e mak ami nia esperansa, maibe iha liur mak sira lahatene ida ne’e ami nia tristeza”. Nia husu

Departamentu Geoloia no petroleum komesa iha 2012 estudante hamutuk 35 ne’ebe maka gradua hotu ona, mai fali 2014 estudante hamutuk 60 no sira mos graduadu hotu ona, iha 2015 no 2016 mos graduadu hotu ona ho total estudante hamutuk 50 resin, iha kontijente 2019 total estudante ne’ebe atu graduadu iha tinan ida ne’e hamutuk 30, no iha 2020 foin ida.

Apolinário husu bainhira hili departamentu ida tenke hatene no koñese didiak area ida ne’ebe estuda.

“Nune’e bainhira sai ba liur mak lahatene no la koñese imi nia area ida ne’e ami sente triste, maibe bainhira imi ba liur mak hatene ida ne’e mak ami nia susesu, maibe ida ne’e depende fila fali ba sira karik hakarak aprende tenke badinas lee no buka informasaun hodi hasa’e sira nia kapasidade.”Aplonáriu dehan

Imajem : Estudante Alópia Maria da Conceição

Estudante Departamentu engenharia sivil, Alópia Maria da Conceição sente kontente tanba konsege to’o ona iha faze ba ezame monografia maske hasoru dejafiu oioin durante prosesu.

“Ha’u sente kontente tebes tanba bele hakat liu dejafiu lubun ida, ohin bele tama ona iha faze apresentasaun rezultadu peskija no avansa ba ezame iha tempu badak, agradese ba departamentu engenharia sivil, familia sira hotu no obrigadu ba Maromak ne’ebe hasulin grasa oioin mai ha’u”. Hateten Alópia Maria da Conceição

Imajem : Ponsiano da Costa de Jesus

Iha fatin hanesan, estudante finalista Ponsiano de Jesus hataten, peskija ne’ebe estudante sira hala’o ne’e prosesu normal iha kada universidade molok gradua iha institusaun ida.

“Prosesu peskiza ne’e prosesu normal ne’ebe kada universidade hala’o antes estudante ida remata, tenke hili tópiku ida ne’ebé hetan aseitasaun husi orientador no sei iha faze selesaun husi teze ikus, hafoin tun ba terenu hodi hala’o peskiza no tuir ezame monografia”. Hateten Estudante Finalista Ponsiano da Costa de Jesus

Ponsiano salienta peskija ne’ebe nia halo durante fulan tolu inklui ho prosesamentu data no halo analizasaun ba rezultadu peskija.

“Peskiza ne’e ha’u hala’o durante fulan tolu (3) maibe tuir faze akizasaun data loron tolu (3) deit ne’ebé maka ami ba tuir instrumentu ne’ebé suporta husi Universidade hodi foti data prossesing no analysis, maibe kona-ba peskiza presiza halo movimentu hodi foti dadus nune’e ha’u halo peskiza kuaze Fulan tolu”.

“Ha’u hakarak ajuda komunidade sira hodi asesu ba bee ho kualidade ne’ebé di’ak, tanba Iha komunidade barak ne’ebé hela besik mota, no sira uza deit bee ne’ebe kontaminadu”. Nia deklara

Estudante finalista ne’e mos husu ba estudante sira atu hatene hatudu pasiénsia no hakaas an hodi hetan susesu tanba la fasil atu konkista objetivu ida sein halo sakrifisiu no dedikasaun aas.

“Ha’u husu atu kolega estudante sira hatene halo esforsu no pasiénsia, nune’e bele sai ema ne’ebe susesu iha futuru tanba susesu ne’e sempre mai husi paixaun no sakrifisiu boot”. Nia hakotu

Enkuantu, estudante hamutuk sianulu resin ualu (98) mak apresenta poster no partisipa iha prosesu apresenta poster monografia (rezultadu peskija) ne’e maka Advisor JICA iha Timor Leste, kompanha sira, instituisaun governu sira no estudante UNTL liliu fakuldade engenharia siénsia no teknolojia.

Jornalista : Marciana Fernandes