Engenharia Sivil UNTL, Prepara Graduadu Kreativu, Inovativu & Kompetitivu
Imajem :Estudante Finalista Lucinda Soares iha Kampus UNTL Hera, 10/01/2025
SAPNewsTL, Dili : Universidade Nasional Timor Lorosa’e (UNTL) nia Fakuldade Engenharia Siénsia no Teknolojia, Departamentu Engenharia Sivil kria programa apresentasaun poster monografia ba estudante finalista hamutuk 64.
Diretor Departamentu Engenharia Sivil Aleixo Sarmento hateten apresentasaun poster monografia sai kultura departamentu nian, oinsa bele forma estudante ne’ebé kreativu no inovativu ba nasaun.
“Departamentu ne’e fo tempu apresentasaun poster monografia ba finalista 64, nune’e sira bele apresenta sira nia kreatividade, rezultadu peskija, hanoin inovativu no kumpri kritériu akadémiku molok sai lisensiadu iha UNTL”. Tenik Diretor Departamentu Engenharia Sivil Aleixo Sarmento ba SAPNews iha Kampus Hera,10/01/2025
Diretor Departamentu Engenharia Sivil Aleixo Sarmento
Diretor ne’e sublinha Departamentu Engenharia Sivil hetan valor A husi ANAAA, rezultadu ne’e fo motivasaun ne’ebé boot ba estudante ativu, finalista sira no alumni sira atu bele dezenvolve no hadia ninia kapasidade, oinsa bele halo inovasaun ba nasaun nia dezenvolvimentu.
“Husi avaliasaun ANAAA fo sai katak Departamentu ne’e hetan akreditasaun A, valor ne’e ekivale 90%, sai motivasaun ba estudante sira katak tenki esforsu an no servisu makaas hodi lori inovasaun ba nasaun”. Nia husu
Finalista Almadino Francisco Xavier rekunhese tama iha mundu akadémiku enfrenta dejafiu barak maibe dejafiu la sai impedimentu ba luta ema nian atu sai susesu.
“Ha’u enfrenta dejafiu barak liliu ekonomia familia, ha’u abandona eskola tinan rua, hafoin ha’u kontinua fali, ohin ha’u tama ona ba faze final, ha’u nia esperiensia preparadu no prontu hodi kompete iha merkadu de traballu, ha’u hein katak sei hetan servisu iha futuru tanba ha’u iha kapasidade”.
Almadino Francisco Xavier
“Ha’u husu ba ha’u kolega estudante sira hodi koragem iha kampus, aprende nafatin, eskola nafatin, labele husik eskola tanba futuru importante liu, ita nia kunhesimentu mak sei lori ita ba moris diak no susesu”. Hateten Almadino Xavier
Lucinda Soares sente kontente tanba bele konklui nia estudu ho durasaun tempu ne’ebe lais, nia parte rekunhese katak atu gradua lais ka tarde ne’e depende ba inisiativu no vontade kada estudante nian.
“Ha’u sente katak dejafiu finansial, limitasaun oioin no falta buat barak maibe ha’u bele to’o ona iha faze final, ha’u kontente tebes ba susesu ida ne’e, ha’u bele dehan katak hotu sedu ka tarde ne’e depende ba ita nia esforsu no inisiativa rasik, se ita badinas, ita bele hotu lailais”. Lucinda dehan
Lucinda fo agradese ba ninia dosente sira tanba bele fasilita no fo akompanhamentu ba estudante sira ho diak husi inisiu to’o faze final.
“Ha’u nia obrigadu no agradese ba dosente sira hotu ne’ebé hadomi no preokupa tebes ami, oinsa ami bele esforsu no sai susesu, Maromak fo bensaun ba sira hotu”. Nia agradese
Tuir dadus ne’ebé SAPNews asesu katak desde 2013-2024, departamentu ne’e produz ona graduadu hamutuk 500 resin no oras ne’e servisu ona iha instituisaun oioin iha rai-laran no rai-liur, enkuantu estudante ativu iha departamentu ne’e hamutuk atus 864 no dosente hamutuk 17.
Jornalista : Marciana da Conceição
