Estrada Ermera Sai Debu ! Igitro : CNRT & PD La’os Ona Alternativa Iha 2028
Imajem : UNEUMER & MOFA hala’o komunikadu imprensa iha Jardim 5 de Maio,01/02/2025
SAPNewsTL, Díli : Relasiona ho estrada ligasaun Gleno ba Letefoho no Atsabe ne’ebe kontinua aat, UNEUMER & MOFA kestiona makaas nonu governu tanba estrada aat difikulta komunidade sira asesu ba merkadu.
Uniaun Estudante Universitáriu Munisípiu Ermera (UNEUMER), no Movimentu Foinsa’e Atsabe (MOFA) hanesan organizasaun estudantil no sosiál ne’ebe hari’i hosi estudante Ermera oan sira hodi hola responsabilidade sai ajente ba kontrolu sosial iha Timor-Leste.
Durante komunikadu imprensa, Presidente MOFA Igitro dos Santos deklara UNEUMER no MOFA sei fo hatene ba povu Ermera hodi la vota iha eleisaun 2028, wainhira governu la rezolve problema estrada Ermera ho sériedade.
“Estrada Ermera la’os buat foun ne’ebe povu Ermera preokupa maibe durante tinan 23 Timor ukun an, estrada sei aat no difikulta komunidade sira, tinan ne’e governu ne’ebe lidera CNRT & PD tenki tau seriedade hodi rezolve tanba tempu kampanha Ermera sai alvu ba buka votus no hetan konfiansa”.
Imajem : Prezidente MOFA Igitro dos Santos
“Se la rezolve mak tinan 2028, inan aman sira, povu Ermera hatene ona katak CNRT no PD la’os ona representa sira maibe representa grupu oan ida ninia interesse, partidu sira labele ba bosok povu no halo promesa falsu, eleisaun mai tan lalika ba vota tan partidu sira ne’ebé la kumpri sira nia promesa tanba sira la’os ona alternativa iha eleisaun 2028”. Tenik Presidente MOFA Igitro dos Santos iha Jardim 5 Maiu, Dili,01/02/2025
Porta Voz Apolinário de Jesus de Deus Dehan Ermera munisipiu ne’ebe kontribui taxa boot ba estadu maibe estrada sai nafatin problema ba komunidade sira.
“Kada mandatu governu ne’ebé ukun hosi partidu ida ba partidu seluk, kondisaun estrada nafatin hasusar movimentasaun povu Ermera, no ita hotu iha estadu ida ne’e hatene katak munisípiu ne’ebé kontribui taxa boot ba estadu mak Ermera (KAFE), no fatin turizmu barak atu bele kontribui reseita domestika ba kofre estadu maibe estrada susar teb-tebes no nakfila ba debu”.
Porta voz ne’e husu governu dasia hodi buka solusaun, nune’e bele rezolve preokupasaun ne’ebe povu Ermera hasoru.
“Ezije ba governu da-sia (IX) ne’ebé ukun hosi partidu CNRT ho PD atu seriu ba resolve preokupasaun ne’ebé munisípiu Ermera hasoru kona-bá Estrada, karik iha periodu ida ne’e mak kondisaun Estrada nafatin aat no auménta pior mak ami nu’udar organizasaun sosiál sei organiza inan no aman sira hosi munisípiu atu la fiar tan ba imi”.
Nia hatutan, “Partidu politiku sira- neʼebé agora hetan asentu iha Parlamentu Nasionál hanesan FRETILIN, PLP, KHUNTO neʼebé sai hanesan opozisaun atu la bele nonok no hakmatek ho povu nia votu ka fiar ne’ebé inan no aman-sira fó ona ba imi. Maibé, presiza imi-nia seriedade iha fiskalizasaun. Nune’e, aprezenta iha uma-fukun Parlamentu Nasionál”.
“Alerta ba sosiedade tomak liuliu hosi sosiedade munisípiu Ermera katak iha periodu ida ne’e mak estrada nafatin aat, signifika partidu polítiku ohin-loron la’os reprezenta povu kiik no ki’ak. Maibé, reprezenta ema uituan ne’ebé moris di’ak iha ema barak nia terus leten”. Nia husu
Fo hanoin fali katak estrada diresaun Gleno ba Postu Administrativu Letefoho, Gleno no Hatulia aat tanba to’o agora governu seidauk foti responsabilidade hodi hadia.
Hafoin notisia ne’e publika SAPNews seidauk halo komfirmasaun ho Ministériu Obras Públicas (MOP) ligadu ho estrada aat tanba sei okupadu ho servisu seluk, maske nune’e maibe antes MOP hatene ona katak estrada Ermera liliu ligasaun Gleno ba Atsabe superktítiku.
Jornalista : Ermelinda Soares & Daniel da Silva
