Estudante Akadémika UNTL 65 Hala’o Estajiu Sosial Iha Luro
SAPNewsTL, Lautem: Administrador Postu Administrativu Luro simu Estudante Estajiáriu husi Universidade Nasional Timor Lorosa’e (UNTL), Fakuldade Ekonomia no Jestaun hamutuk nain ne’en nulu resin lima (65) iha Administrasaun Postu Administrativu Luro
Iha intrevista Administrador Postu Administrativu de Luro, Augusto Feliciano Ramos Branco hateten nia kontente ho prezensa estudante UNTL sira iha Postu Luro hodi hala’o estajiu, nia hein katak sira mai ho aktividade ne’ebe programadu nune’e sei implementa iha komunidade tuir buat ne’ebe sira hetan iha Universidade.
“Ohin ami simu ofisialmente, ita nia alin estajiariu sira ne’e, ami ho laran kontente, haksolok tebes-tebes simu estajiariu sira mai iha Postu Luro hodi hala’o estajiu, espera katak sira mai ho programadu, sira bele implementa iha terrenu buat ne’ebe sira iha hetan iha Universidade ” . Tenik Administrador Postu Administrativu Luro Augusto Feliciano Ramos Branco liu husi intrevista iha nia kna’ar fatin Adminstrasaun Postu Luro. Segunda-Feira, 24/07/2023.
Administrador Postu Luro ne’e hatutan, estajiariu sira labele sente mesak tanba sira prontu kolabora ho sira nia estajiu ne’ebe hala’o durante fulan rua iha Postu Luro
“Ha’u mos fo hatene ba sira katak maske sira mai husi fatin oi-oin maibe sira labele sente mesak, sira agora integra ona mai iha Postu Luro durante fulan rua, ne’ebé ami iha ne’e mos prontu kolabora, servisu hamutuk ho sira karik alin estajiariu sira husu ami nia ajuda, ami hein katak sira bele adapta ambiente Luro hodi servisu iha komunidade nia le’et”. Dehan Administrador
Augusto akresenta, estudante estajiariu sira ne’e hamutuk hitunulu resin rua ne’ebe sei destaka ba iha Suku tolu ne’ebe iha Postu Luro hodi hala’o sira nia estajiu.
“Estajiariu sira ne’e ita desloka ba Suku tolu iha Postu Luro; Suku Afabubu, Suku Baricafa no Suku Luro hodi sira hala’o nia aktividade, sira sei hamutuk ho komunidade, espera katak sira bele pratika ho di’ak buat ne’ebe sira hetan iha universidade no sira mos bele aprende I lori buat di’ak ruma”. Nia hakot
Jornalista: Luis Pailofo