Estudante UNTL, Elves Kandidatu Ba Xefe Suku Açumano

SAPNewsTL, Dili : Relasiona ho Eleisaun Líderansa Komunitáriu ne’ebe sei realiza iha loron 28 fulan Outubru tinan ne’e, Estudante UNTL Elves Manuel Pinto Barreto, regista ona ninia ninia kandidatura iha Suku Açumano, Bazartete Munisípiu Likisa

Estudante Universidade Nasionàl Timor Lorosa’e (UNTL), Fakuldade Engenharia Ciensia no Teknolojia, Departamentu Engenharia Informatika ne’e submete ninia dokumentu Kandidatu ba Komisaun Eleisaun Suku iha loron 13 Outubru

Kandidatu Xefe Suku Açumano, Postu Administrativu Bazartete Munisípiu Likisa, Elves Manuel Pinto Barreto, haktuir Nia sei serví ho asaun no bali ho responsabilidade hodi hari’i Sosiedade Açumano ne’ebe paz, solidáriu, fraternu no laiha diskriminasaun

“Ha’u mai ho motto, ‘Serví ho Asaun Bali ho Responsabilidade’ ho Prinsípiu, ” Responsivu, Kuidadór, Umilde no Sabedoria” hodi konkretiza vizaun Hamutuk ho komunidade hari’i Suku Açumanu ida ne’ebé Paz, Solidáriu, Fraternu no la iha Diskriminasaun”. Tenik Kandidatu Xefe Suku Elves Manuel Pinto Barreto ba SAP News iha Suku Açumano Posu Bazartete Munisípiu Likisa, 15/10/2023

Kandidatu Xefe Suku ne’e afirma nia misaun tolu mak nia sei organiza komunidade hotu partisipa iha prosesu dezenvolvimentu Suku, envolve komunidade hotu iha prosesu toma desizaun ba interese komum no respeita no tane as valor kultural sira suku Açumano nian.

Ho Objetivu hodi valoriza estadu direitu demokratiku, defende interese komum, lori sidadaun sira hotu atu ba hatene programa ne’ebé mak atu dezenvolve suku, no hakbesik atendimentu públiku ida mais efisiente no promove Prinsípiu Boa Governasaun.

Programa sira mak haktuir iha kraik :

1. Atendimentu públiku ho dignu, justu no ekilíbriu. No mos kria relasaun diak ho entidades hotu iha suku laran
2. Servisu hamutuk ho Governu, NGO Lokal no Nasional Inklui Ajensia Internasional sira. Hodi bele garante ba dezenvolvimentu suku
3. Apoiu ba Grupu ka individu ne’ebé kria Empreendedorismu, karpintaria, agrikultura pekuaria no floresta hodi bele kontribui ba kresimentu ekonomia nian
4. Proposta ba entidade relevante konaba dezenvolvimentu infraestrutura hanesan; Estrada, Bee mos, Eletrisidade nst….
5. Tau matan ba ferik no katuas sira inklui maluk ho kondisaun defisiente sira
6. Hamoris nafatin atividade desportu komunitaria hodi promove talentu joven sira nian iha area desportu.

Estudante ativu UNTL ne’e akresenta, nia parte nia sei implementa programa hirak ne’e hotu iha nia mandatu wainhira hetan fiar husi povu hodi kaer ukun iha Suku Açumano Postu Administrativu Bazartete Munisípiu Likisa

“Ha’u promete sei hala’o programa hirak ne’e hotu, wainhira hetan fiar husi povu Açumano, tan ne’e Ha’u husu ba komunidade Suku Açumano hodi depozita konfiansa ba hau hodi servi imi ho diak tuir imi nia preokupasaun sira, keta haluha vota ba Ha’u Elves Manuel iha Loron 28 Fulan Outubru tinan 2023”. Nia Husu

Tuir Informasaun ne’ebé SAP News asesu liu husi Komisaun Eleisaun Suku Açumano katak Kandidatu Xefe Suku Açumano hamutuk ema na’in 10, Kandidatu hirak ne’e mane hotu laiha feto, Suku Açumano kompostu husi Aldeia Caicasaico, Hatumatilu, Kirlelo , Siskoelema

Enkuantu, Eleisaun Líderansa Komunitáriu sei realiza iha loron 28 Fulan Outubru tinan 2023, daudaun ne’e iha territóriu nasionál Kandidatu Xefe Suku sira hahu konsolida komunidade sira ho programa oioin hodi vota ba sira iha eleisaun tinan ne’e

Jornalista : Marcela Lemos