Estudante UNTL Kuda Ai-Oan 150 Iha Kampus Engenharia
SAPNewsTL, Dili : Estudante foun tinan letivu 2024 kuda ai-oan hamutuk 150 iha aredor kampus Fakuldade Engenharia Siénsia no Teknolojia, Universidade Nacional Timor Lorosa’e (FEST-UNTL) hera.
Objetivu husi kuda ai-oan ne’e hodi hafurak kampus FEST-UNTL ne’ebe matak, buras no malirin ba estudante sira, Dosente sira no ema hotu ne’ebe hala’o vizita iha kampus fakuldade engenharia.
Presidente Assosiação Académica Estudantil FECT UNTL Sergio Alves da Costa kongratula no apresia estudante foun sira hotu tanba bele kolabora ho Assosiasaun Estudantil no Komisaun Organizadora hodi bele kontribui ai oan, rede no baja sira.
“Apresia tebes estudante foun sira, Komisaun Organizador sira hotu, imi hotu kolaborasaun servisu no komitmentu ne’ebe forte, ohin ita konsege kuda ai oan hamutuk 150 iha ita nia resintu kampus hera, ne’e atu hatudu katak ita mos iha sentidu de responsabilidade hodi kontribui ba UNTL no Nasaun Timor Leste ninia ekolojia”. Tenik Presidente Assosiasaun Akadémiku Estudantil FEST UNTL, Sergio Alves da Costa iha kampus hera, 15/03/2024
Ai-oan sira ne’ebe estudante foun sira kuda mak hanesan pucuk merah, no ai marungi, ai oan hirak ne’e estudante sira asegura kedas ho rede no baja ka besi kotak, nune’e evita balada sira labele estraga tanba iha kampus hera seidauk iha moru protesaun.
Senadu Estudantil ne’e mos husu ba estudante foun sira atu labele soe foer arbiru, proteze ambiente no hadomi natureza tanba kontribuisaun ba ekolojia ne’e importante ba nasaun iha loron aban bainrua.
“Kada estudante asume responsabilidade, dever no obrigasaun moral hodi asegura ambiente ne’ebe moos, katak estudante tenki soe foer iha foer fatin, labele tesi ai arbiru no kuidadu ita nia ekolojia tanba ambiente importante ba ema hotu nasaun ida”. Nia husu
Estudante foun tinan akadémiku 2024 ne’ebe partisipa iha atividade kuda ai oan ne’e hamutuk atus tolu sianulu (390).
Jornalista : Anina Martins