Fakuldade Engenharia Realiza Engineering Games UNTL

SAPNewsTL, Dili : Assosiasaun Akadémika Estudante Fakuldade Enjiñaria Siénsia no Teknolojia (AAE-FEST) servisu hamutuk ho estrutura fakuldade no Gabinete Vise-Reitora Asuntu Estudantil halo ona abertura ba Atividade Estra-Kurrikulariu Engineering UNTL Games 2024 iha Kampu Futebol Hera

Iha diskursu Vise Dekanu Asuntu Estudantil José Pinto haktuir Programa Engineering Games inisia husi assosiasaun fakuldade ho objetivu atu hametin unidade, fraternidade no dezenvolve talentu estudante sira nian iha UNTL

“Program Engineering games inisia husi assosiasaun fakuldade, Ohin ita halo abertura ba programa ne’e hahú ho futebol, hafoin ba modalidade sira seluk, tan ne’e husu ba jogador sira atu joga ho di’ak ho ispíritu desportivu hodi dezenvolve estudante sira nia talentu no prepara ba kompetisaun nasionál, regional no internasionál tanba antes ne’e ita nia estudante lubun ida hola parte ona iha eventu internasional sira”. Dehan Vise Dekanu Asuntu Estudantil José Pinto liu husi diskursu iha kampu futebol Hera, 23/02/2024

Vise Dekanu ne’e husu ba estudante sira ne’ebe hola parte iha jogu ne’e hodi hatudu performansia no kualidade, nune’e bele sai jogador diak iha prezente no futuru liliu labele iha konflitu wainhira tebe sala malu.

“Wainhira tebe sala malu, bele husu deskulpa ba malu, hatudu imi nia performansia no dezenvolve talentu ne’e ho didiak ba oin.

Lider Fakuldade ne’e mos fo agradese ba patrosinador hirak ne’ebe ho laran luak fo apoia finansial no material ba jogu engineering games UNTL 2024 liliu BNCTL, MJDAK, PAX, Timor Telekom, Xalila Fuel, Nano Sport, Componente Naval inklui sira ne’ebe apoia direita no indireita.

Iha fatin hanesan, Representante Ministériu Juventude Desportu Arte no Kultura (MJDAK), atual Xefe Departamentu Edukasaun Sivika no desportu husu estudante sira hodi kontribui no fo susesu jogu liliu prepara an kompetisaun nasional tantu internasional.

“Iha desportu sempre iha manan no lakon, mosu mos naksalak wainhira tebe malu, maibe labele baku malu no kria problema. Imi tenki dezenvolve an didiak hodi bele partisipa kompetisaun nasional no internasional sira iha futuru”. Hateten representante MJDAK

Modalidade Futebol refere partisipa husi klube hamutuk sanulu resin ida (11), entre sira mai husi staff fakuldade, alumni fakuldade, no estudante ativu sira iha Fakuldade Enjiñaria.

Iha jogu abertura ne’e, hetan partisipasaun maksimu husi estudante sira, estrutura fakuldade no departamentu, funsionariu sira no dosente sira.

Antes ne’e klube ida husi Fakuldade Enjiñaria sai kampiaun ba taxa lubun inklui hetan klasifikasaun sira iha kompetisaun nasional sira ne’ebe organiza husi instituisaun relevante sira.

Enkuantu, Programa Engineering game ne’e hetan apoia finansial no material husi MJDAC, BNCTL, Timor Telecom, Componente Naval, Mr. Hiroshi Kawanishi (Advisor JICA in FECT-UNTL), PAX, Nano Sport, Xalila Fuel no seluk tan.

Jornalista : Marcela Mery da Costa