Festivál Rabilau ! CBO Transforma Lixu Sai Objetu Artístiku

Imajem : Koordenador CBO Viquiano Gama Fonseca iha Maubisse,18/10/2024. Foto : Daniel da Silva

SAPNewsTL, Ainaru : Community Base Organisation (CBO) nia Koordenador Viquiano Gama Fonseca konsidera Timor ne’e Timoroan hotu nian, ema hotu iha responsabilidade hodi sai na’in ba solusaun iha problema lixu liu hosi halo inovasaun no la soe foer arbiru.

Koordenador CBO Viquiano Gama Fonseca hateten lixu buat ne’ebé ema hotu la gosta, maibe wainhira halo transformasaun lixu sai objetu ida mak ne’ebé ema gosta.

“Ami hamutuk iha servisu voluntáriu hodi luta ba green enviroment (ambiente verde) liu hosi plastic art, ami transforma lixu sai objetu ne’ebé ema bele gosta tanba normalmente ema hotu la gosta lixu, ita presiza halo resiklajem, reutilizar no reduz lixu liu hosi transformasaun ba inovatividade, tanba Timor ita nian, ita mak tenki kuidadu ninia ambiente no kontribui ba nia mudansa”.Tenik Koordenador CBO Viquiano Gama Fonseca iha Maubisse, 18/10/2024.

Koordenador CBO Viquiano Gama Fonseca hatutan, atu halo redusaun ba problema lixu iha Timor-Leste maka tenki hapara importasaun plástiku hosi rai liur no investe iha indústria resiklajem no reuitilizar.

“Iha dalan rua ne’ebé ita bele rezolve problema lixu iha Timor mak fator sosial no tékniku, katak 1. Governu presiza hapara importasaun plátiku husi rai liur liu hosi halo lei hodi regula produtu importasaun no 2. Investe iha indústria rejiklajem no reutilizar, nune’e bele hamenus lixu iha Timor-Leste”.Nia sublinha

Koordenador CBO Viquiano Gama Fonseca

Problema lixu iha Timor-Leste la’os povu nia sala maibé mai hosi produtu importadu sira tanba ne’e presiza fo kontrolu máximu ba produtu hosi rai-liur.

“Lixu ema barak no soe arbiru ne’e la’os povu Timor nia sala tanba la’os povu mak produz plástiku maibe lixu barak ne’e mai hosi produtu importasaun sira, tan ne’e ita presiza hamutuk halo mudansa no fo kontrolu máximu ba ita nia produtu sira hosi estranjeiru”.Nia husu

Fonseca aprofunda katak joven sira tenki sai na’in solusaun problema ambientál liu hosi la soe foer arbiru, halo transformasaun, no inovasaun ba lixu hirak ne’ebé ema soe.

“Joven tenki sai na’in ba solusaun problema lixu iha Timor-Leste, Joven sira presiza foti responsabilidade hodi aposta iha kreatividade, produtividade no inovatividade tanba nasaun ne’e ita nian, ita mak tenki proteze ambiente país nian, kuidadu ita nia ambiente no halo inovasaun ba nasaun.” Nia tatoli

Enkuantu, idade lixu non orgániku hanesan kaneka plástiku dura to’o tinan 50, popok tinan 450, kaixa fulan 2, Surat tahan semana 6, tixu semana 2-4, sakola plástiku tinan 1-20, kalen lata tinan 200, Aqua tinan 450 no hena tinan 1-5.

Entrevista kompletu bele klika iha link tuir mai, iha Festivál Rabilau, Postu Administrativu Maubisse, Munisípiu Ainaru, 18 Fulan Outubru 2024.

https://www.facebook.com/SAPNewsTimorLeste/videos/1924850164671601/?app=fbl

Jornalista : Marciana Conceição