FFTL Sei Realiza Kopa FFTL 2024
SAPNewsTL, Dili: Federasaun Futebol Timor-Leste (FFTL) sei realiza Kopa FFTL 2024 maski daudaun federasaun ne’e rasik lidera husi prezidente interinu ho membru ezekutivu deit seidauk iha prezidente foun.
“Daudaun ne’e ita iha ona planu para realiza atividade desportu mak Kopa FFTL ba futebol ho futsal, kompetisaun ba jogador idade U-16 ho ekipa nasional sira iha tinan 2024 maibe falta teknikamente, ita hein hela karta ida husi FIFA atu nune’e membru ezekutivu bele realiza reuniaun kona ba planu sira ne’e, para bele hala’o atividade desportu ne’e rasik iha fulan marsu nia laran”, dehan prezidente interinu FFTL Domingos Raul “Falur Rate Laek” ba jornalista sira iha Taibessi, Dili domingu (18/02/2023).
Prezidente interinu hatutan, daudaun FFTL seidauk iha prezidente foun lidera deit ho prezidente interinu hamutuk ho membru ezekutivu maibe sira sei esforsu para realiza atividade desportu sira ba jogador sira iha Timor-Leste.
Entretantu, daudaun ne’e tinan 2024 ne’e FFTL rasik seidauk iha prezidente foun hanesan mos ho orgaun liga la iha prezidente hotu, tan ne’e mak FFTL realiza atividade desportu Kopa FFTL ba futebol ho futsal, kompetisaun ba jogador idade U-16 no kompetisaun ba ekipa nasional sira iha tinan 2024.
Reportajen: Augusto dos Santos