Fo Krisma Ba Sarani 400 ! Keta Haluha, Maromak Akompanha Ita Lor-Loron

SAPNewsTL, Baucau – Durante selebra loron Parokia Sagradu Korasaun de Jesus Villa Nova no fó Krisma ba sarani sira, Bispu Dioseze Baukau Dom Leandro Maria Alves hateten fuan mak sentru ema nian no abut ne’ebe fo moris, fuan ne’e mak Jesus Kristu rasik.

Amo Bispu Dom Leandro Maria Alves, fó parabéns ba Parokia Villa Nova Baucau, ne’ebé selebra festa solenidade Sagradu Korasaun de Jesus, iha ne’ebe parokia ne’e hamahan an bá, durante tinan sanulu resin ida (11).

“Parabens ba Parokia Villa Nova, Jesus nia fuan ida ne’ebe nakonu ho domin tebes, husi Jesus nia futar fuan santu ne’ebé mak moris hodi hetan salvasaun, ita hotu hatene katak fuan mak sentru ema nian, hanesan abut ida ne’ebé fó moris, no hun ba moris ema ida nian, hare mos husi parte fiziku nian, fuan mak sentru ne’ebe fahe ba ita nia orgaun sira hotu”.Dehan Bispu Dioseze Baukau Dom Leandro Maria Alves iha Parokia Villa Nova Baucau,Sesta(07/06/2024)

Bispo Dom Leandro Maria Alves hateten, fuan mak parte ida ne’ebé importante tebes iha ema nia moris, no fuan ne’e maka Jesus Kristu ne’e rasik, no Jesus mak sai hanesan parte fundamental husi moris sarani nian.

“Ne’e duni fuan mak sai hanesan parte ida ne’ebe importante tebes-tebes iha ita nia moris, fuan ida ne’e mak ita nia jesus kristu rasik, Jesus Kristu mak sai hanesan parte ida ne’ebe fundamental husi ita nia moris sarani nian, se ita hanesan sarani mak hadok an husi ita nain jesus kristu, ita bele dehan neneik-neneik ran la to’o mai ita mos sei paradu”.Dom Leandro dehan

Aman Dioseze Baukau ne’e akresenta, selebrasaun refere atu fo agradese ba Na’in Maromak ne’ebe liu husi Jesus Kristu nafatin loke fuan no laran ba sarani sira tanba Maromak hadomi teb-tebes nia povu sira.

“Festa ida ne’e lori ita hakarak agradese Na’i Maromak ba buat hotu ne’ebé Nai Maromak haraik mai ita, ne’ebé haree konkretamente iha ita nain Jesus Kristu, fuan ida ne’ebe mak ita bele dehan loke an hela de’it mai ita, hakarak ita fila ba Nai Maromak, tanba maromak hadomi ita tebes-tebes”. Nia haklaken

“Maromak dehan wainhira Israel sei kosok Oan hela, ‘ha’u hadomi nia no ha’u bolu ha’u oan husi rai Egiptu, hasai nia husi atan’, hasai ita husi atan sala nian, hasai ita husi forma atan nian ne’ebé mak ita idak-idak koñese no sei iha hela ita nia aan, Maromak dehan ‘Ita sei iha hela ita nia inan nia aan, ha’u salva ó no hanorin ó atu la’o’, ne’e duni Na’i Maromak akompaña ita loron-loron”.

Bispu Baukau ne’e, haklaken Maromak sempre besik, la’o hamutuk hela ho ema hotu tanba Na’i Maromak nunka abandona nia ema sira iha mundu.

“Maromak la’o hamutuk hela ho ita, dala barak ita dehan Na’i Maromak ne’e dok, maibe Na’i Maromak ne’e besik hela mai ita no la’o hamutuk hela ho ita, iha primeira leitura profeta Ijaias nia dehan ‘Maromak la’o ho ita no akompanha ita, atu la’o ne’e katak Maromak iha ita nia sorin, Maromak la abandona ita”.

“Dala barak ita mak hases an husi Na’i Maromak no hanoin katak maromak ne’e dook tebes, maibe lae, maromak besik tebes ho ita, Na’i Maromak ne’e iha ita nia fuan, buat importante mak fiar no rekonese katak maromak hela ho ita, maromak kaer ita nia liman hodi la’o hamutuk ho ita iha moris lor-loron nian”. Nia akresenta

Segundu Bispu Leandro Maria Alves, São Paulo iha segunda leitura hateten momos katak “Na’i Maromak ne’e manifesta nia domin ne’e mai ita laos liu deit husi liafuan, maibe liu husi nia oan mane mesak ita nia jesus kristu, husi jesus kristu mak ita sira ne’e hotu forma isin lolon ida ne’ebe hanaran igreja, igreja laos buat seluk ka ema seluk, igreja mak ita sira hotu ne’ebe simu ona sakramentu, no fiar iha Na’i Jesus Kristu,”e

“Jesus nia sorin ka nia fuan ne’ebe mak ema sona sulin mai ran kahur ho wee, jesus nia fuan ne’ebe ema sona ho dima ne’e nakloke hela para hakarak ita no naksulin nia domin ne’e mai ita ema, husi jesus nia liafuan mak ita rona, lia fuan ne’ebe dehan, ‘Mai besik ha’u imi hotu ne’ebe kolen no terus, ha’u sei fo kaman ba imi, simu ha’u nia ukun ba hodi banati tuir, tan ha’u laran hamaus no haraik-an no imi sei hetan hakmatek ba imi nia klamar’, jesus bolu ita hotu, nia hili ita hotu, hakoak ita hotu laos tanba ita merese maibe tamba nia domin ida ne’ebe rohan laek”.

Lider Dioseze Baukau ne’e, fundamenta katak Jesus nia domin ida ne’ebe bo’ot tebes-tebes ba ema, nia bolu ema hotu hakbesik ba nia tamba nia fuan nu’udar santuáriu ne’ebe ema  bele haksumik an no helik an ba, ne’e duni jesus nia fuan santu ne’e sai fatin hakmatek no ema nia refúziu fatin atu deskansa, fatin atu kura ema nia kanek, no fatin ba ita atu hetan liberdade no libertasaun ninian.

Enkuantu, sarani hirak ne’ebe tuir sakramentu krisma hamutuk atus haat resin iha Parokia Sagradu Korasaun de Jesus Villa Nova, Baukau.

Jornalista : Dircia Baptista Belo