Fo Krisma Ba Sarani Tutuala ! Dom Leandro : Reza Tersu & Hatudu Hahalok Di’ak
Imajem : Bispu Dom Leandro Maria Alves fo krisma ba sarani sira iha Kuaze Parokia Mehara, 01/06/2024
SAPNewsTL, Lautem – Bispo Dioseze Baucau Dom Leandro Maria Alves fo sakramentu Krisma ba sarani Tutuala hamutuk atus ida limanulu iha ambitu missa elevasaun Estasaun Missionaria Nossa Senhora de Fátima Mehara ba Kuaze Parokia.
Iha Homilia Bispo Dioseze Baucau Dom Leandro Maria Alves haktuir simu sakramentu krisma hodi sai soldadu Kristu nian ne’ebe hatudu hahalok di’ak sira.
“Imi simu sakramentu krisma katak imi atu sai ema ne’ebe mak adultu, adultu iha fiar ninian imi sai Kristu nia soldadu, soldadu Kristu nian la lori kilat maibe kilat ne’e mak Na’i Jesus Kristu rasik, kilat ne’e mak ita nia hahalok di’ak, kaer tersu reza loron-loron kilat musan ne’e mak tersu ne’e”. Dehan Bispo Dioseze Baucau Dom Leandro Maria Alves liu husi nia homilia iha Mehara, 1/06/2024
Bispo Leandro hatutan krismadu sira sai ona soldadu Kristu nian nune’e buka atu moris tuir doutrina igreja nian hatudu an nu’udar sarani.
“Presiza hamoris imi nia an iha vida sarani ninian moris tuir doutrina igreja ninian, ne’e duni imi buka atu hakbiit imi nia an ho doutrina igreja ninian ne’e”. Tenik Bispo
Imajem : Krismadu Sira iha Kuaze Parokia Nossa Senhora de Fátima Mehara
Bispo Baucau ne’e mos husu ba krismadu sira atu hatudu sira nia an liu husi orasaun hodi reza tersu tanba husi ne’e mak bele komtempla Jesus nia moris.
“Ne’e duni ba imi, imi mak buka atu tahan sai ona soldadu Kristu nian ne’e buka atu hatudu imi nia an hanesan soldadu lalos ho buat kroat maibe ho orasaun sira reza tersu, tersu ne’e labele husik,
wainhira reza tersu ne’e koalia ho Na’i Jesus Kristu hamutuk ho Maria ko’alia ho Na’i Jesus tanba wainhira reza tersu ne’e komtempla vida Na’i Jesus Kristu ninian”. Dom Leandro hameno
Dom Leandro mos fo parabens ba Krismadu sira tanba bele simu ona sakramentu krisma hodi sai soldadu Kristu nian.
“Ha’u nia parabens ba krismadus sira tanba imi simu ona sakramentu krisma, imi sai ona soldadu Kristu nian”. Nia parabeniza
Entretantu, total krismadus sira ne’ebe simu sakramentu krisma husi Bispo Dioseze Baucau iha âmbitu missa elevasaun Estasaun Missionaria Nossa Senhora de Fátima Mehara ba Kuaze Parokia ne’e hamutuk atus ida limanulu nulu (150)
Enkuantu, selebrasaun ne’ebe hala’o iha igreja Nossa Senhora de Fátima Mehara ne’e pertense ba iha Postu Administrativu Tutuala Munisípiu Lautem, iha tempu hanesan Bispu Baukau ne’e mos halo ona elevasaun estasaun refere ba kuaze parokia Mehara.
Jornalista: Luis Pailofo