Foinsa’e Brani & Kuriosidade ! Hari’i Mídia Sein Finanseira

SAPNewsTL, Dili : Lia tatoli husi foinsa’e sira ba ezisténsia Mídia SAP News iha sosiedade Timor Lorosa’e, Foinsa’e Gil Ximenes Gusmão konsidera SAPNewsTL nu’udar mídia ne’ebe iis foun, hari’i deit ho nia modalidade maka brani no kuriosidade, ne’ebe iha paixaun no dedikasaun ba servi povu kiik no kiak sira.

SAPNewsTL : Gil Ximenes Gusmão Hatene Kona-Ba SAPNewsTL ?

Gil : Orgullu ho SAPNews nu’udar  media ida ne’ebé iis foun, ne’ebé harii hosi  jerasaun foun, joven duni no estudante  ho paixaun no dedikasaun ba partilla informasaun mak kredivel no mos sai matan, tilun ba komunidade ne’ebé laiha lian no ba sira ne’ebé ema lakonsege rona sira nia lian no laharee hetan sira nia sofrimentu. Media ida ne’e hari’i ho esforsu no dedikasaun tomak, foinsa’e sira  ho nia kosaar-wen rasik turuk no fera ulun  hodi hari’i media ida ne’e.

Media ne’e rasik eziste no idéntiku husi joven  feto no mane, hosi dialetu oin-oin ne’ebé eziste iha rai lalatak lafaek nian ne’e leten, hodi aprezenta identidade Timoroaan ne’ebé mai ho diversidade no variedade dalen no kultura, hatudu mos valores demokrasia.

SAPNews media juvenil, media ne’ebé harii ho  modal (kapital) mak brani no kuriozidade, no fatin ba kadernizasaun, hosi media ne’e bele kapasita mos joven sira para aprende no kompriende realidade ne’ebé eziste iha Timor-leste, liga ba injustisa sosial, kontratu meza okos (mafia), no planu no progresu ne’ebé estadu Timor-leste alkansa. Ha’u louva ran maluk  timoroan  ne’e hahu hola resposabilidade  no iha sentidu prentense boot ba estadu ida ne’e liu hosi kotribuisaun oituan-oituan maibé iha signifikadu boot, hosi kontribuisaun sira ne’e ita bele halakon tiha estigmasaun negativa sosiedade nian mai ita joven.

SAPNewsTL : Gil Ximenes Gusmão Nia Esperansa Ba SAPNewsTL ?

Gil : Media ne’e sei boot no buras liu tan sai mahon ba foinsa’e sira, hodi kontribui liu hosi hakonu sidadaun sira nia direitu fundamental  koanaba asesu informasaun, defende liberdade espresaun no haburas valores demokrasia iha Timor-Leste.

Adapta tuir globalizasaun, dezevolve an nafatin,  kompetetivu no fixa an ba dezafiu hotu-hotu ne’ebé media ne’e rasik sei enfrenta, maibé la signifika hases an hosi dezafiu, tamba dezafiu ne’e nu’udar adubu organiku diak ida hodi halo media ne’e krese no dezafiu sei sai fatuk inan ne’ebé hada ba pondasi atu media ne’e bele hamriik metin.

SAPNewsTL : Gil Ximenes Gusmão Nia Mensagem Ba SAPNewsTL ?

Gil : Imi ho esforsu boot liu husi dalan klot harí média ida ne’e,  kontinua esforsu ba tamba susesu lalos mai hosi ezmola,  husu atu nafatin sobre vive  hodi defende povu ne’ebé esploradu, vitima ba polítiku sira nia arogánsia, liu hosi publika informasaun sira hodi públiku  bele hatene problema real ne’ebé povu enfrenta, hanesan meus ida atu ezije  ba sira ne’ebé kaer kanedok iha dapur estadu nian hodi rezolve problema ne’ebé povu ki’ik sira enfrenta.

Ha’u husu media ne’e pro ba povu ki’ik, pro ba joven, servisu ho profesional  tuir kodigu etika jornalsita nian, komprimenta ba lei no norma sosial sira ne’ebé relevansia ba servisu media no kontinua valores no identidade rai terus nain no povu revolsionariu Timor-leste ida ne’e.

Ikus liu karik ha’u nia liafuan simples ida katak “se ita ema moris  buka lialos (justisa), karik lialos ita  hetan ona,  ita nia servisu tuir mai mak transmite ka fahe  lialos, maka imi nia servisu maka buka lialos no fahe lialos”. Parabens SAPNews, “Iti Maa Fuli Kesi, Tana Maa Fuli Sifa, Fuu U Nai, Amunai, Taa Gau Mutusare, Sapnews Gofu Fanu Gau Laa”. (Hamrik Hamutuk, Kaer Liman Hamutuk, Isin Ida Deit. Laran Moos Ba Malu, Lori Sapnews Ba Oin).

 

Jornalista  : Ermelinda Soares