Foinsa’e Hamutuk 45 Tuir Formasaun Diskursu Públiku
SAPNewsTL, Lautém : Presidente Assosiação Académica Estudantil, Fakuldade Engenharia Siénsia no Trknolojia (FEST-UNTL) Sergio Alves da Costa fasilita formasaun diskursu públiku (public speaking) ba membru organizasaun juvenil, Klibur Foinsa’e Fini Luro (KFFL) hamutuk 45 iha Postu Administrativu Luro Munisipiu Lautém.
Objetivu husi formasaun diskursu públiku ne’e, atu hasa’e kunhesimentu foinsa’e sira nian, hadia atetude diskursu no aumenta kapasidade foinsa’e sira, oinsa sai foinsa’e ne’ebe kualidade no kompetitivu iha futuru.
Presidente Assosiasaun Fakuldade Engenharia Siénsia no Teknolojia, Sergio Alves haktuir foinsa’e sira presiza hetan formasaun no koragem husi ema sira ne’ebe iha ona kunhesimentu hodi kompartilla matenek ba sira.
Membru Klibur Foinsa’e Fini Luro, sira iha vontade atu aprende, aprende kona ba diskursu no debate, lider no lideransa, lingua no jestaun, nune’e Presidente Assosiasaun Akadémika Estudantil hanoin hakarak fasilita formasaun oinsa bele eleva no hakroat pensamentu foinsa’e sira nian iha Lautém.
“Ha’u mak deside no komunika ho foinsa’e sira iha Klibur Foinsa’e Fini Luro hodi fasilita formasaun tanba iha tempu hanesan sira mos fo formasaun diskursu públiku ba foinsa’e sira iha Luro”.
“Hanesan Dom Bosku hateten, Laiha foinsa’e ne’ebe aat, so seidauk iha ema ne’ebe tulun foinsa’e sira atu sai diak no diak liu tan, nune’e ha’u fo formasaun hanesan presidente assosiasaun estudantil fakuldade engenharia nian, iha ne’ebe hakarak forma no transforma foinsa’e ne’ebe brani, mental diak, hatene ko’alia iha públiku, hanoin kroat, iha atetude diak no foinsa’e ne’ebe forte no matenek”. Tenik Presidente Assosiasaun FEST-UNTL Sergio Alves da Costa iha Lautém, 13/03/2024
Presidente Assosiasaun ne’e mos husu ba foinsa’e Luro-Lautém oan sira hodi badinas lee, hasa’e kultura literasia, rona barak diskursu sira, aprende ho ema se deit ne’ebe hasoru no buka referénsia husi lider nasionál liu husi sira nia diskursu.
“Imi tenki tau iha laran katak, ema se mak ita hasoru, ne’e ita nia mestre no iha fatin ne’ebe ita aprende, ne’e ita nia eskola. Tan ne’e imi tenki lee barak, rona barak no aprende husi lider nasional sira nia maneira diskursu inklui buka referénsia internasionál sira hodi dezenvolve ita nia an rasik”. Sergio fundamenta.
Foinsa’e sira ne’ebe partisipa iha formsaun durante loron rua (12-14/03/2024) ne’e hamutuk 45, entre sira mai husi membru Klibur Foinsa’e Fini Luro no Foinsa’e sira seluk ne’ebe involve iha organizasaun sira seluk iha Luro.
Jornalista : Luis Pailofo