Nelyo: Atleta Kompete Olimpiade 2024 Tenki Iha Fasilidade Nasional
SAPNewsTL, Dili: Ministru juventude desportu arte kultura (MJDAK) Nelyo Isaac Sarmento informa, atleta Timor-Leste kompete olimpiade 2024 iha nasaun Fransa tenki iha fasilidade nasional labele ba tanba gosta malu atu iha kapasidade ka la iha kapasidade.
“CONTL ho CDTL tenki fo informasaun detallu katak ita nia atleta se mak kualifikadu kompete iha olimpiade tanba Timor-Leste hetan oportunidade rua ba olimpiade 2024 mak bele liu husi wildcard no atleta kualifikadu, serake tinan ida ne’e Timor-Leste hetan wildcard ka lae? Karik la hetan entaun tinan ida ne’e atleta partisipa olimpiade 2024 sei la iha, ita hein katak komunikasaun ho esforsu sira husi CONTL halo minimu iha atleta ida bele hetan wildcard atu nune’e kompete iha olimpiade 2024 maibe atleta hetan wildcard iha nasional tenki iha kondisaun”, dehan ministru juventude desportu arte kultura Nelyo Isaac Sarmento ba jornalista sira iha Xanana Sport Center Bairro Formosa, Dili sabadu (16/03/2024).
Ministru hatutan, bainhira iha federasaun ida hetan wildcard maibe kondisaun interna la iha fasilidade hanesan fatin treinamentu no atleta la iha ne’e ba partisipa ne’e ita la moe ka? labele kontente ba bainhira uma laran buat ida la iha ita tenki moe.
“Hau husu CDTL ho CONTL mai halo diskusaun ho governu muda oituan hanoin ka mental, labele kontinua beibeik hanesan ne’e para neineik bele dezenvolve ho kondisaun governu iha bele organiza didiak atleta sira sai profesional, labele buat hotu ho gosta malu atu iha kapasidade ka la iha kapasidade kompete jogu olimpiku, ida ne’e ladun diak hadia neineik tenki koalia buat sira ne’e para bele koriji malu detekta buat diak reprezenta nasaun ba jogu internasional”, tenik Nelyo
Governante ne’e informa tan, nia seidauk hetan informasaun kona ba atleta sira ba jogu olimpiade 2024 tanba ida ne’e CONTL nia servisu hein katak sira tenki hatene atleta hetan wildcard kondisaun nasional tenki iha, governu hein servisu hamutuk husi CDTL ho CONTL koriji neineik failansu sira ne’e para hetan solusaun diak ba futuru.
Entretantu jogu Olimpiade 2024 sei hala’o iha iha sidade Paris, Fransa komesa iha loron 26 fulan jullu 2024 to’o loron 11 fulan Agostu 2024, olimpiade ne’e sei realiza jogu husi modalidade 32.
Reportajen: Augusto dos Santos
