Grupu Traballu Tranzisaun Kursu Medisina Jeral Aprezenta Preparativu Ba PM Xanana
Imajem : Ekipa grupu trabalhu kursu medisina jeral iha Timor-Leste, Dili, 11/02/2025
SAPNewsTL, Díli – Ekipa grupu trabalhu kursu medisina jeral iha Timor-Leste aktualiza servisu ba Primeiru-Ministru Kay Rala Xanana Gusmão.
Tuir Koordenadora grupu traballu Célia Gusmão hateten ekipa grupu trabalhu kursu medisina jeral iha Timor-Leste nia ekipa ne’ebé kompostu husi liña ministerial aprezenta sira ninia preparasaun no planu ba Primeiru Ministru Kay Rala Xanana Gusmão hodi husu governu ninia komitmentu.
‘’Ami husi ekipa traballu ne’ebé kompostu husi gabinete Vise Primeiru Ministru Mariano Assanami, Ministru Ensino Superior Siénsia no Kultura no Ministra Saúde halo despaxu ida ba ekipa traballu atu haree planu kona-ba tranzisaun kursu medisina jeral ninian ba Timor, ekipa ne’e hahu servisu iha juñu 2024″,”Dehan koordenadora Célia Gusmão ba Jornalista sira iha Palacio Governo, 11/02/2025
Nia informa ekipa traballu ne’e estabelese atu haree kona-bá planu tranzisaun kursu Medisina Jerál iha Timor ne’ebé hahú servisu iha fulan Juñu 2024.
“Ami iha ona roteiru ida kona-bá ida-ne’e, ami mai atualiza servisu sira bá Primeiru-Ministru atu haree bainhira planu ne’e hala’o ekipa presiza kompromissu ida atu bele realiza ona” Nia haktuir
Nia informa, Primeiru Ministru rekomenda ba grupu traballu atu elabora rezultadu análiza ho nia planu sira hafoin submete ba ninia gabinete no aprezenta hodi hetan aprovasaun husi konsellu ministru.
‘’Primeiru Ministru husu atu ami elabora hotu, submete dokumentus kona-ba analiza sira ne’e no planu sira hafoin sira bele haree lori ba Konsellu Ministru’’ Célia relata.
Entertantu, ekipa traballu ne’e kompostu hosi Ministériu Saúde (MS), Ministériu Ensinu Superiór Siénsia no Kultura (MESSK), Universidade Nasionál Timor-Leste (UNTL) lideradu hosi Koordenadora, Médika Célia Gusmão.
Jornalista : Eleonora Fátima
