Guvernu Sei Prosesa Dadus Dezastre Natural, Gabinete PR Fo Apoia Emerjensia
Imajem Uma Komunidade ne’ebe afetadu ba dezastre Natural, iha Bobonaro, Sabadu (11 /03/ 2023). Foto : Media PR
SAPNewtl, Bobonaro : Relasiona ho Dezastre Natural ne’ebe akontese iha loron hirak liu ba, Prezidénsia Repúblika, José Ramos-Horta, liu-hosi Gabinete Servisu Sosisedade Sivíl no Assuntu Sosiál (SSAS), Sábadu ne’e, distribui nesessidade bázika ba vítima dezastre naturais iha Suku Soilesu no Ilat-Lau, Munisípiu Bobonaro.
Dezastre natural ne’ebé akontese iha loron 3 fulan Marsu tinan 2023, estraga rezidénsia husi uma-kain 18 iha Aldeia Soilesu no Ai-Aras, Suku Soilesu no uma-kain 6 ne’ebé pertense ba Aldeia Ilat-Laun, Postu Administrativu Bobonaro.
“Kontente tanba ita hotu-nia kontribuisaun ita-bele ajudu ita-nia maluk sira neebé hetan dezastre naturais. Sasan oituan neebé mai husi Prezidente Repúblika Horta, ne’e ita hotu nia ajudu” Dehan Quintiliano Moníz Amaral, nuudár Assesór ba Gabinete SSAS-Prezidénsia Repúblika iha Bobonaro, Sabadu (11 /03/ 2023)
Tuir Quintiliano Moniz, Xefe Estadu hakarak atu iha intervensaun lalais ba sidadaun sira neebé mak afetadu husi dezastre naturais ruma no sempre orienta ekipa, hodi halo verifikasaun no mobiliza apoiu, hodi hakmaan sidadaun ne’ebé hetan susar.
Xefe Suku Soilesu, Norberto Martins Simão
Xefe Suku Soilesu, Norberto Martins Simão, agradese ba Prezidente Repúblika nia apoiu ba vítima dezastre naturais.
“Agora sira susar tebes ba hela fatin no ai-han, tanba hafoin akontesimentu ida-nee, hau relata kedas ba parte autoriedade munisipál, maibé la iha resposta emerjénsia too agora, tanba nee, ho prezensa Xefe Estadu nia apoiu sosiál nee ami agradese tebes, ida nee mak ami presija duni ba apoiu emerjésia, nee hanesan domin ida boot ba nia povu” Agradese Autoridade lokál nee.
Imajem Gabinete Presidente Republika Apoiu Komunidade Afetadu Dezastre Natural iha Munisipiu Bobonaru
Líder Komunitáriu sira aprezenta dadus kona-ba estragus ba Prezidénsia Repúblika, hodi mobiliza apoiu ba vítima sira.
“Ekipa Prezidénsia Repúblika mos distribui apoiu ba vítima dezastre naturais iha Aldeia Ilat-Laun neebé seidauk hetan apoiu ruma husi governu” Dehan Nia
Hafoin akontesimentu, parte autoriedade munisipál, seidauk mai nunee ho apoiu nee, lori komunidade afetadu husi suku agradese ba apoiu husi Xefe Estadu atuál, Agradese Xefe Suku Ilat-Laun, Juvenal Pires Amaral.
Autoridade Lokál ne’e relata katak, estragus ba rezidénsia komunidade ne’e akontese, hafoin udan boot durante semana rua nia laran. Tuir observasaun, rai-halai hodi taka uma balun no balun estraga total no vitima sira la salva sira nia sasan uma-laran inklui animál no estragu ba planatasaun sira.
“Dadaun ne’e vítima sira kontinua hela provizoriamente ho viziñu hodi hein, intervensaun husi governu” Nia Dehan
Material ne’ebé Prezidénsia Repúblika disponibiliza mak hanesan, ai-han, sasan uma laran no dapur nia, sanitasaun no nesessidade bázika seluk. Entretantu, Ekipa mos identifika família vulnerável balun, durante viajen ba Bobonaro no distribui direta apoiu ba sidadaun neebé moris mukit