Hadia Sidade ! Eviksaun Tasi-Tolu, Fatin Hari’i Badeira Rin
![](https://sapnewstl.com/wp-content/uploads/2024/08/IMG-20240813-WA0055.jpg)
Imajem : Eviksaun ba komunidade hamutuk uma kain 11 iha Tasi-Tolu,13/08/2024. Foto : Conzita Mota
SAPNewsTL, Dili – Sekretariu Estadu Asuntu Toponomia no Organizasaun Urbanu(SEATOU) Germano Santa Brites Dias, ho ekipa konjunta kontinua halo eviksaun bá komumidade nia uma hamutuk sanulu-resin-ida(11) iha area Tasi-Tolu.
“Ohin ami mai iha Tasi-tolu, ami tenki hasai sira tanba fatin ida ne’e presiza tebes atu hadia, hodi hetan vizita husi Santu Padre Francisco no hadia fila fali bandeira rin ne’ebe desde antigu, ita Presiza hadia fila fali halo diak, lolos ne’e laos liga ho amu papa nia vizita, eviksaun ka despezu bà administrativu ne’e mai kedas ona iha tinan kotuk”.dehan Sekretariu Estadu Asuntu Toponomia no Organizasaun Urbana,Germano Santa Brites Dias bà Jornalista sira iha tasi-tolu, Tersa-Feira,(13/08/2024).
SEATOU, Germano hatutan, servisu eviksaun ne’e la relevante ho Amu Papa nia vizita mai Timor, sira nia servisu hahú ona, molok rona informasaun kona bá Amu Papa nia vizita mai Timor-Leste.
“Ami halo servisu iha terenu ne’e seidauk rona avizu ka mensagem Santo Papa atu mai vizita Timor-Leste, ami servisu normal, servisu baibain, SEATOU ho ekipa konjunta servisu iha teritóriu tomak liliu iha sidade Dilí, atu hadia, organiza sidade ne’ebe moos, kaber no sai seguru bá ema hotu”Dehan Germano.
SEATOU afirma, antes ne’e komumidade sira hetan ona kompensasaun bá estadu governu liu husi ministériu obras públikas (MOP) no Ajénsia Dezenvolvimentu Nasionál (ADN) hodi bele husik hela fatin.
“Ohin ita mai iha tasi-tolu, bá maluk sira ne’ebe daudaun ne’e ita haree husi kotuk, uma sira ita dudu ne’e la’os indiminiazasaun maibe kompensasaun bà estadu, governu liu husi ministerio obras publika(MOP) no ADN fó ona osan uitoan bà sira para bele hasai sasan”Nia dehan.
Germano dehan fatin tasi tolu ne’e fatin protezida bá komumidade sira ne’ebé hela bá laos tanba santo papa nia vizita mai Timor maka atu hasai, ne’e lalos.
“Tasi-Tolu ne’e populasaun sira tenki ses husi fatin ne’e tanba fatin ne’e protezida bá ema hotu-hotu laos tanba Santu Papa nia vizita maka obriga imi, atu hasai ne’e lalos, antes iha tinan kotuk liu bá sidadaun sira rona ona notisia santu papa mai iha Timor komumidade sira ne’ebe okupa iha àrea tasi-tolu, governu sei la prepara fatin,maibe husu atu ida-idak fila fali bá ninia munisipiu”.nia salienta.
Germano Brites husu komumidade sira ne’ebe okupa espasu públiku, valeta leten, trotoar leten, atu kontribui no muda a’an husi area protezida sira.
“Prossesu despeza administrativu ne’e normal hela, la’o baibain hela iha fatin hotu-hotu iha Díli laran tomak komumidade ne’ebe okupa iha valeta leten, trotoar leten,sira tenki sai, ami haka’as an para husu sira nia kontribuisaun para bele muda a’an sai husi fatin ne’ebe kategoria espasu públiku”. Nia hakotu.
Komumidade ne’ebé hetan evikasaun iha loron 13 fulan Agustu hamutuk uma kain sanulu-resin-ida(11) iha area Tasi-tolu postu administrativu Dom-Aleixo, Suku Comoro,Aldeia 12 de Outobru. Komunidade hirak ne’e hetan ona kompensasaun hamutuk rihun hitu USD (7.000$) kada uma kain.
Jornalista : Ekipa Kobertura