Hafoin Simu Investidura, Augusto Ramos Hahú Misaun Foun
Imajen Serimonia Kultural husi Administrador Postu Administrativu Luro Augusto Feliciano Ramos Branco iha Luro, 08/10/2022. Foto : Alela Ramos
SAPNewsTL, Lautém : Hafoin Vise Ministru Administrasaun Estatal Lino de Jesus Torrezão halo investidura ba Administrador Postu Administrativu Tolu iha Munisipiu Lautém hanesan Postu Luro, Lore no Lautém iha loron 7 Fulan Outobru, Ohin Administrador Postu Administrativu Luro Augusto Feliciano Ramos Branco hahú nia misaun foun hafoin partisipa serimonia kultural no agradesimentu husi Administrador Sesante Tomas Cabral
Tuir Administrador Augusto Feliciano Ramos hateten atu desenvolve Postu Luro presiza entidade hotu nia apoiu no kooperasaun hamutuk
“Ha’u la’os ema foun ba Luro, maibe servisu ne’ebe ha’u assume ne’e foun, tan ne’e atu desenvolve Postu Luro, ha’u presiza entidade hotu nia servisu hamutuk, kooperasaun no apoiu hodi lori bem estar ba ita nia Povu Luro”. Tenik Administrador Postu Luro Augusto Feliciano Ramos iha nia Diskursu, Luro-Lautém, 10/10/2022
Imajen Serimonia Investidura husi Vise Ministru Administrasaun Estatal Lino de Jesus Torrezão ba Administrador Postu Administrativu Luro Augusto Feliciano Ramos Branco iha Salaun Administrasaun Munisipiu Lautem, 07/10/2022
Administrador Postu ne’e hatutan sei servisu makaas liu tan ho komponente hotu-hotu liliu autoriedade lokal (Liura/Xefe Suku sira) hodi haree hamutuk problema sira ne’ebe akontese iha Postu Administrativu Luro
Entretantu, antes ne’e Administrativu foun ne’e mos halo serimónia kultural ba knaar no resposabilidade foun ne’ebe sei asume durante tinan haat nia laran, iha serimonia kultural refere hetan partisipa husi Vise Ministru Administrasaun Estatal Lino de Jesus Torrezão, Presidente Autoriedade Munisipiu Lautém Domingos Savio inklui autoriedade lokal sira no komunidade sira
Serimonia Investidura realiza iha Salaun Administrasaun Munisipiu Lautem iha Loron 07 Outobru, Serimonia Kultural realiza iha Suku Afabubo Postu Luro, Loron 08 Outobru no serimonia agradesimentu ba primeira dia realiza iha Salaun Administrasaun Postu Luro, loron 10 Outobru tinan 2022
Imajen Serimonia Agrasimentu no Diskursu Agradesimentu husi ADministrador Sesante Tomas Cabral, iha Salaun Administrasaun Postu Luro, 10/10/2022.
Iha fatin hanesan, Administrador Sesante Tomas Cabral fo agradese no apresia ba servisu sectorial iha postu Administrativu Luro ne’ebe durante ne’e kolabora no servisu hamutuk tinan ida iha nia Mandatu
“Ha’u agradese tebes ba ita hotu nia servisu hamutuk durante tinan ida nia laran ba komunidade Luro, ha’u mos husu deskulpa karik durante mandatu iha naksalak ruma ne’e ha’u halo la monu ba ita boot sira nia laran, ha’u husu deskulpa “. Dehan Eis APA Luro Tomas Cabral iha nia Diskursu Agradesimentu
Enkuantu, Serimonia ne’e hetan partispa husi komandante Eskuarda PNTL Luro, Amu Paroku Nossa Senhora Ranha dos Apostolus de Luro Pe. Augustu Delfim de Sá, Madre sira, Xefe Suku Afabubo, Barikafa, Cotamutu, Luro, Lakawa no Vairoke, Funsionáriu sira inklui Komunidade sira
Jornalista : Luis Pailofo
Editor : Ekipa Editorial