Hahalok Trabalhador Austrália & Korea Di’ak ! Governu Sei Rekruta Timoroan 27.000 Ba Nova Zelandia
Imajem : Sekretáriu Estadu Formasaun Profesionàl no Empregu (SEFOPE) Rogério Araujo Mendonça iha Timor Lodge, 15/01/2025.
SAPNewsTL, Díli — Sekretáriu Estadu Formasaun Profesionàl no Empregu (SEFOPE) Rogério Araujo Mandonça informa, Governu Nova Zealandia sei halo rekrutamentu ba trabalhador Timoroan hamutuk 27 mill hodi ba serbisu iha Nova Zelandia.
SEFOPE Rogério Araujo Mandonça hateten, prosesu ba Programa Laboral Mobilidade ba Nova Zelandia atinji ona 75%, nune’e Governu Timor-Leste ho Nova Zealandia iha faze preparativu hodi kria kondisoens, molok halo rekrukamentu ba trabalador sira.
“Ha’u hanoin ita iha ona faze 75%, faze preparativu entre Governu Timor-Leste ho Nova Zelandia, entaun fulan fevereiru tinan ne’e ekipa ida sei desloka husi Nova Zelandia mai Timor-Leste hodi kordena ho SEFOPE nune’e ita bele aumenta forsa trabalhu preparativu hodi asina memorandu entendimentu”. Dehan Sekretáriu Estadu Formasaun Profesionàl no Empregu (SEFOPE) Rogério Araujo Mandonça ba jornalista sira, iha salaun Multifunsional Timor Lodge, Quarta (15/01/2025)
Nia hatutan, kriteria ba trabalador ne’ebe atu ba serbisu iha Nova Zealandia jeralmente Governu Timor-Leste aplika tuir Programa Laboral Mobilidade Australia, hodi fó oportunidade ba joventude sira atu ba serbisu iha Nova Zelandia.
“Ita aplika kritéria hanesan ho Programa Laboral Mobilidade Australia, tamba sira ne’ebe aplika iha nasaun sira hanesan Australia, Inglatera, Kanada no Nova Zelandia hanesan deit, nune’e kriteria ba juventude sira mak tenki iha koiñsementu ba lingua no iha kapasidade ba area ruma ne’ebe iha hodi hetan oportunidade”.
Rogério salienta, agora faze preparasaun ne’ebe Governu Timor-Leste hala’o hetan apoiu husi Governu Australia, signifika Timor-Leste tenki prense rekezitus balun hodi kria kondisoens ba Nova Zelandia nian.
“Konserteza Sekretáriu Estadu Formasaun Profesionàl no Empregu sei loke vaga ba públiku hanesan trabalador 55 mill ne’ebe oras ne’e serbisu iha estrangeiru, entaun preprasaun mak Governu Nova Zelandia sei hala’o vizita mai Timor-Leste nune’e Governu Timor-Leste liu husi SEFOPE sei ba vizita fila fali Nova Zelandia hodi hetan komfirmasaun finais”.
Sekretáriu Estadu Rogério Araujo Mandonça akresenta, kuota ne’ebe Governu Nova Zelandia indika mai Timor-Leste ho total númeru 27 mill valida ba nasaun Asia pasific maibé prioridade númeru kuantidade bo’ot liu mak Timor-Leste, entaun iha 2025 Nova Zelandia sei hasa’e tan númeru.
“Nova Zelandia sei rekruta trabailhador Timoroan 27 mill ba serbisu iha Nova Zealandia, ho rajaun ita nia trabalador Timoroan ne’ebe serbisu iha Australia no Korea hatudu komportamentu diak, nune’e empregador sira husi Nova Zealandia sei halo rekrukamentu ba traballador Timoroan sira tuir prosesu ne’ebe Governu estabelese” Nia hakotu.
Entretantu, iha loron 24 Setembru 2024 Sekretáriu Estadu Formasaun Profesionàl konfirma ona ho Embaixadora Timor-Leste nian ba Nova Zelandia, Idelta Rodrigues katak Governu Nova Zelandia iha vontade atu implementa Programa Mobilidade Laboral hodi bele lori traballador timoroan ba serbisu iha Nova Zelandia, nune’e traballador sira sei simu salariu kada oras $24.97 ekivale ba dolar Amérikanu liu rihun $10-resin.
Jornalista: Guilhermino Ramos da Cruz
