Hakfodak Ho Andar Barak Iha Atsabe, KHUNTO Preokupa Estrada Sei Aat
SAPNewsTL,DILI-Lui husi plenaria tersa-feira ne’e iha uma fukun Parlamentu Nasionàl, Deputadu Bankada Kmanek Haburas Unidade Nasional(KHUNTO), Antonio Verdial, lamenta ho problema infraestrutura ne’ebe komunidade postu administrativu Atsabe hasoru.
Tuir Deputadu Bankada Kmanek Haburas Unidade Nasional Timor Oan ( KHUNTO ) hateten durante nia vizitasaun ba postu administrativu Atsabe hare’e katak maioria komunidade menus infraestrutura. Hanesan menus postu de saude, estrada ne’ebe aat, no eskola ne’ebe do’ok
Husi vizitasaun deputadu ne’e observa direitamente situasaun real ne’ebe mak povu sira hasoru iha postu administrativu Atsabe munisipiu Ermera
“Durante loron rua(2), nia laran ha’u hala’o vizita ba suku rua iha Posto Administrativu Atsabe munisipiu Ermera, hodi observa situasaun real ne’ebe povu infrenta, ko’alia ho Administrador Postu Administrativu Atsabe, Diretur Saude Postu Atsabe, Xefe Suku no nia estrutura sira, Avo lia nain sira, servisu extensaun sira ba asuntu Agrikultura no Saude mak hanesan extensiolista sira promotor Saude Familiar no Grupu suporta Inan sira”.
“Ha’u mos uza opportunidade ida ne’e hakbesik ba eskola hodi hare kondisaun eskola, no rona professores sira kona-ba dejafiu ne’ebe sira enfrenta iha sira nia kna’ar nu’udar manorin na’in”.Dehan deputadu bankada Khunto, Antonio Verdial iha nia intervensaun, iha plenaria Tersa-feira iha parlamentu nasional, Tersa-feira(19/09/2023).
Nu’udar membru parlamentu ida sai hanesan matan, tilun ibun ba povu Timor-Leste, haknaar ann iha instrumentu politiku, Kmanek Haburas Unidade Nasional Timor Oan ( KHUNTO ),dever atu tatoli halerik hotu ne’ebe rona no mos hare’e susar hotu ne’ebe mosu iha povu nia moris, liu-liu halai ba asuntu importante, ba dezenvolvimentu nasaun rai doben ida ne’e, ne’ebe hanesan Saude, Edukasaun no Agrikultura
“Ha’u halo sorumutu iha Suku Laklo, iha loron 15 fulan Setembru, ha’u atu ko’alia konaba Asuntu Saude, Infraestrutura eskolar, estrada no mos postu saude no mos sei ko’alia kona-ba servisu agrikultural nian”Tenik nia
Deputadu ne’e mos hatutan, ukun an hahu’u iha tinan 2002 ate agora maske iha mudansa la barak maibe, uitoan povu halo mudansa ba sira nia an rasik, liu husi sira haruka oan ba sevisu iha rai liur hanesan, Korea, Australia, Inglatera (UK), sira nia oan mak haruka osan mai sira nia inan no aman hodi hadia sira nia hela fatin.
“Ita tama ba Postu administrativu Atsabe ita hakfodak tanba kuaze maioria povu nia uma andar barak teb-tebes, maske dalan aat laiha ponte hodi fasilita sira iha tempu udan, Rai rahun iha tempu bain loron no rai tahu iha tempu udan, maibe povu kontinua nafatin hadia sira nia moris liu husi, oan no familia ne’ebe servisu iha rai liur, no hala’o negosiu kiik iha Kapital Dili” nia hakruir
“kondisaun Estrada ne’ebe aat fo impaktu ba Saude no mos Ekonomia, iha suku balu mak seidauk iha postu Saude, maske populasaun iha suku ne’e prense ona kriteira para hari’i postu saude, maibe ate agora seidauk iha postu Saude no laiha atendimentu pesoal saude ne’ebe efetivu, komunidade Asesu ba postu Saude ne’ebe do’ok teb-tebes”
Entertantu, Deputadu Bankada Khunto ne’e mos atu hari’i mos uma no apoiu transporte ba pesoal saude sira hodi hela, atu nune’e sira nia atendimentu ba komunidade ne’e efetivu. Atu sira mos ba kontrola pasiente sira ne’ebe do’ok husi postu saude, no bele fasilita sira no transfere pasiente sira ne’ebe grave mai iha Hospital Nasional Dili lais liu tan.
Jornalista : Anina Martins