Hari’i Iha Inserteza & Fillial Tinan 7 ! Felizmente, Eskola Sekundaria Fernando Lasama Luro Sai Susesu

SAPNewsTL, Lautem – Durante tinan hitu Eskola Sekundaria Fernando Lasama Luro sai Filial ba Eskola Sekundaria Jeral Nino Conis Santana Lospalos, Diretor Servisu Edukasaun Munisipiu Lautem Anibal Fernandes hateten Sekundaria Fernando Lasama Luro hamrik mesak ona nu’udar Sekundaria Jeral iha Lautem tanba ne’e husu Luro oan sira atu kontinua hamutuk lori eskola ne’e ba oin.

Tuir Diretor Servisu Edukasaun Munisipiu Lautem Anibal Fernandes katak Eskola Sekundaria Fenando Lasama Luro hamrik mesak ona nu’udar Sekundaria Jeral tanba ne’e nia fo apresiasaun ba ekipa inisiador no kontinuador ba professor sira hotu sira bele hamrik mesak ona.

“Iha ita nia desizaun bolu ona Diretor Eskola katak imi hamrik mesak ona, ita hotu hader sai aman no aman ba oin nafatin tanba ne’e ami fo apresiasaun ba ekipa instaladora Luro oan sira, iha inisiador iha mos kontinuador, maske inisiador hasoru difikuldade katak uluk edifisiu la iha maibe ohin loron instala tiha unidade rua ba ESG Lasama, ida ne’e hatudu katak imi bele hamrik mesak la’os atu sai oan”. Dehan Diretor Servisu Edukasaun Munisipiu Lautem Anibal Fernandes liu husi nia diskursu hafoin remata serimonia nomeasaun ba gabinete diretiva foun iha edifisiu ESG Fernando Lasama Luro, 10/06/2024

Diretor Edukasaun Munisipiu Lautem ne’e husu atu kontinua hamutuk lori eskola ne’e ba oin tanba ne’e sira hotu nia responsabilidade tanba sira hotu nia esforsu mak sira bele hari’i eskola sira bele atinje sira nia mehi.

“Hamutuk lori eskola ne’e ba oin, nasaun ne’e ba oin, lori mundu mai Timor, lori Timor ba mundu, ita presiza relasaun diak ho komunidade ka nasaun ne’ebe boot hodi apoiu dezenvolvimentu liuliu iha area edukasaun, nune’e eskola ida ne’e ita husu atu eskola ne’e tenke fo benefisiu bo’ot ba Lautem, nune’e edukasaun ida ne’e iha ita hotu nia liman no responsabilidade, atu la’o ba oin ka ba kotuk ne’e iha ita nia responsabilidade, obstakulu barak hasoru maibe hirak ne’e hotu mak dezafia hodi vense imi obstakulu sira atinje imi nia mehi, mehi mak bele hari’i eskola katak Luro oan bele tanba liu husi forsa no esforsu ne’ebe tau hamutuk bele atinje ita nia mehi”. Diretor hameno

Iha fatin hanesan, Xefe ekipa instalador ba Eskola Sekundaria Jeral Fernando Lasama Luro Cecílio Soares informa Sekundaria Fernando Lasama ne’e hari’i tanba mai husi inisiativa no esforsu Luro oan sira nian ne’ebe durante ne’e luta esforsu no ohin eskola bele hamrik mesak sai nu’udar Sekundaria Jeral.

“Eskola ne’e hari’i mai husi inisitaiva Luro oan ninian, esforsu rasik husi Luro oan, prosesu ne’e kontinua eskola ida hari’i iha inserteza nia laran, la garante buat ruma bazeia ba esforsu rasik, inisiativa rasik oinsa loron ida sai diak, estatutu ida tinan hirak nia laran sai nafatin hanesan sanak husi Ensinu Sekundria Konis Santana nian maibe nafatin luta oinsa konkretiza mehi katak loron ida eskola ne’e tenke hamrik mesak, nune’e ohin mehi sira ne’e sai realidade sai nu’udar Eskola Sekundaria Jeral Fernando Lasama Luro”. Tenik Cecilio

Nune’e mos Diretor Eskola sesante Adolfo Paulo Hornay agradese ba ekipa instalador sira nia esforsu ne’e halo hodi bele estabelese Sekundaria Fernando Lasama ne’e iha Luro.

“Agradese ba ekipa inisiador ekipa instaladora ne’ebe hahu tinan 2016 estabelese ensinu Sekundariu, ami hanesan rekurus umanu prinsipal ne’ebe mak hola parte atu kontribui apoiu ba ESG Fernando Lasama ne’ebe mak instala no eziste dadauk iha Postu Luro ne’e, ami iha Profesor sanulu resin haat ne’ebe iha 2017 sai hanesan kontratu nasional maibe iha 2016 tinan ida resin ne’e voluntariu, prosesu naruk ne’ebe mak liu ohin bele hamrik mesak ona, eskola ida ne’ebe ho nia gabinete diretiva fiksu legalizadu no formalizadu husi komisaun funsaun publika ninian, ne’e ami agradese no orgullu tebes”. Adolfo parabeniza

iha sorin seluk, alumni eskola sekundaria Fernando Lasama Luro, Sergio Alves da Costa kongratula ekipa instaladora no manorin sira hotu inklui ema hotu ne’ebe apoia hari’i eskola ne’e liliu ikus bele hamrik mesak ona iha Lautem.

“Ha’u nia kongratulasaun ba ekipa instalador tomak, manorin sira no ema hotu ne’ebe apoia ke to’o ohin loron eskola sekundaria ne’e bele hamrik ho estatutu rasik hanesan sekundaria jeral,  nu’udar alumnae ida husi eskola ne’e sente gratitude tanba ho prosesu ne’ebe difisil tebes no la’o naruk maibe to’o ohin loron eskola ne’e bele hetan estatutu nu’udar esninu sekundaria jeral ne’ebe kore an ona husi fillial eskola sekundaria Nino Konis Santa Lospalos, obrigadu wa’in tebes ba ema hotu ne’ebe kontribui direta tantu indireta.”Alumni Sergio Alves da Costa agradese

Sergio Alves konta, iha tinan 2016, ema hotu la fiar katak eskola ne’e bele hari’i tanba laiha estudante no ema barak duvida ho hari’i eskola ne’e, iha momentu ne’eba estudante sira ba rejistu hotu ona iha Lospalos, mestre sira telefone tuir maibe barak lakoi eskola iha Luro tanba laiha kondisaun no la garante katak eskola ne’e bele hari’i, to’o hari’i ema barak kontinua tau iha kestaun tanba laiha edifisiu no estudante sira eskola iha kuartu ne’ebe antes uza ba kapela iha Luro, maibe prosesu ne’e kontinua la’o naruk to’o ohin loron bele hamrik mesak.

“momentu ne’ebe konsidera hanesan inserteza, halo ema barak duvida no mosu kestaun barak kona ba naran eskola no sustentabilidade eskola ne’e nian, prosesu ne’ebe difisil tebes, maske nune’e, maibe manorin sira kontinua servisu makaas iha nonok nia laran, sira firme iha dedikasaun no prestasaun liu husi hanorin, fo koragem no enkoraja tebes ami estudante sira iha tempu ne’ebe difisil, sira nia domin no disponibilidade tomak ne’ebe fo ba foinsa’e sira, ne’e vale apena tanba ita bele dehan to’o ohin loron ami balun gradua ona, balun sempre hatudu prestasaun diak iha universidade sira, balun hetan ona servisu no balun sei eskola no tuir kursu sira, ida ne’e hatudu katak sira bele no esforsu ne’ebe sira halo ne’e la saugati”. Alves da Costa sublinha

Iha momentu ne’eba, Manorin sira hanorin voluntariu deit, estudante sira iha deit aula rua, aula ida ho numeru estudante na’in 6, hafoin la’o liu tiha fulan ida, estudante balun ne’ebe estuda iha lospalos deside fila fali ba Luro hodi eskola, entaun estudante aumenta ba sanulu resin tolu, entaun fahe tiha ba rua turma Programa Ciensia Teknolojia no Ciensia Sosiais, hafoin prosesu ne’e la’o, Ministeriu Edukasaun mos konsege kontrata professor hamutuk 16, ikus maibe estudante sira kontinua halo transferensia durante tinan ida rejista estudante hamutuk 29 husi programa rua.

Hafoin tinan 2016, iha tempu orientasaun ba estudante foun tanba aula la sufisiente entaun Koordenador Eskola (Almerindo Pina) deside hamutuk ho professor sira no estudante sira halo aula provizoriu hodi uza ba ensinu aprendijajem tanba numeru estudante aumenta rezulta aula laiha atu uza ba ensinu, nune’e sala de aula provizoriu ne’ebe hari’i husi professor sira no estudante sira ne’e uza to’o tinan 4, maske nune’e maibe aula balun uza hamutuk eskola ensinu baziku sentral Luro tanba sira nia aula balun mamuk iha oras loraik nian.

“Felizmente, to’o ohin loron eskola ne’e bele hamrik mesak ona tanba iha ona sala aula ne’ebe sufisiente hodi uza ba prosesu ensinu aprendijajem kada loron, orgullu tebes tanba espetativa ne’ebe iha durante ne’e, la’o to’o tinan 7 konsege konkista ona rezultadu ida ne’e. Entaun ha’u fo parabens boot ida ba komponente hotu iha Luro, espera katak bele servisu hamutuk no servisu makaas liu tan hodi forma foinsa’e Luro oan sira ba futuru ne’ebe diak liu hodi servi familia, sosiedade no nasaun”. Sergio hateten

Entretantu, eskola ne’e harii iha tinan 2016 ne’ebe utiliza Edifisiu EBC Luro no sala provizoriu ne’ebe harii husi profesor no estudante sira iha tinan 2017, estudante ne’ebe frekuenta hela estudu iha eskola refere por volta atus lima resin, iha ne’ebe ho nia manorin sira hamutuk nain sanulu resin hitu (17).

Jornalista: Denilia Soares & Olandina Pinto