Hasa’e Produsaun Agríkola ! MAP Sei Sosa Trator 425 Fasilita Agrikultor Sira

SAPNewsTL, Lautem – Sekretariu Estadu Floresta (SEF) Fernandino Vieira da Costa hateten Ministerio Agrikultura Peske Pekuaria no Floresta sei sosa tan traktor no prepara kualidade fini hodi fasilita povu agrikultor sira.

Iha entrevista ho Sekretariu Estadu Floresta Fernandino Vieira da Costa haktuir atu dezenvolve natar sira presiza apoiu material no ekipamentus sira tanba ne’e Ministeriu Agrikultura nafatin tau iha planu hodi sosa traktor bo’ot no hand traktor sira ba povu agrikultura.

“Ita hatene katak atu dezenvolve agrikultura sira liu-liu oinsa atu dezenvolve natar presiza mos materiais sira, Ministeriu Agrikultura nafatin tau planu para bele prepara hanesan Traktor no mos hand traktor”. Dehan Sekretariu Estadu Floresta Fernandino Vieira da Costa hafoin remata kollieta hare iha Suku Cotamuto Postu Luro Munisípiu Lautem, 13/06/2024

SEF informa iha tinan ne’e Ministeriu Agrikultura sei sosa traktor bo’ot unidade ruanulu resin lima no traktor kiik unidade atus haat hodi fasilita komunidade agrikultura sira.

“Tinan ida ne’e ita sei nafatin sosa traktor bo’ot hamutuk ruanulu resin lima (25) unidade depois ita sei sosa tan atus haat (400) hand traktor ne’ebe sei sosa iha tinan ida ne’e hodi nune’e fasilita ita nia povu agrikultura ne’ebe mak iha Suku Postu no Munisipiu sira”. Tenik Sekretariu Estadu

Governante ne’e fundamenta sira sei prepara mos fini ne’ebe kualidade no orienta komunidade ba produsaun organiku hodi bele kompete iha merkadu.

“Ita mos prepara kualidade fini hodi fahe ba ita nia povu agrikultor sira, ita mos sei prepara aimoruk fahe ba sira hodi nune’e sira bele hasa’e produsaun agrikola maibe ita nia orientasaun ba povu agrikultura ne’e tenke agrikultura ne’ebe orienta ba organiku, ita produsaun agrikola ne’e tenke ho organiku hodi nune’e ita bele kompete iha merkadu”.Katak Fernandino

Sekretariu Estadu Fernandino akresenta governu nafatin iha komitmentu hodi fasilita komunidade sira ba merkadu wainhira povu agrikultor sira iha produtu.

“Ha’u hanoin kuandu povu agrikultura sira iha produtu governu liu-liu Ministeriu Agrikultura Pekuaria Peska no Floresta nafatin iha komitmentu para fasilita, nune’e sira bele lori nia produtu ba merkadu hodi labele dependente ba aihan husi rai liur”. Nia afirma

Entretantu, Sekretariu Estadu Floresta ne’e relata fini ne’ebe durante ne’e distribui ba povu agrikultura ne’e mai husi rai laran, fini ne’ebe produs husi povu agrikultura.

“Durante ukun an ne’e agora dadauk fini hare ne’ebe iha ne’e agora dadauk ita produz iha rai laran, ita la dependente fini ne’ebe mai husi rai liur tanba ne’e agradese teb-tebes liu-liu ba povu agrikultura ne’ebe nafatin servisu no hetan asistensia tekniku Ministeriu Agrikultura Peskas Pekuaria no Floresta.

“Nune’e sira nafatin dezenvolve fini hodi labele dependente fini ne’ebe mai husi rai liur, agora daudauk distribui ba 13 Munisípiu inklui RAEOA ne’e fini ne’ebe husi rai laran husi povu agrikultor sira ne’ebe dezenvolve”. Nia hakotu

Jornalista: Sandra Soares & Denilia Soares