Inséndiu Resulta Ahi-Han Professor 1 ! Ambulânsia Iha Laclubar Kondisaun Aat

Imagem : Ahi-han uma iha Manelima, Postu Administrativu Laclubar, Munisípiu Manatutu, 29/04/2025. Foto : Autoridade Komunitáriu Suku Manelima

SAPNewsTL, Manatutu : Relasiona ho inséndiu ne’ebe mosu iha Aldeia Lafulau, Suku Manelima, Postu Administrativu Laclubar, Municípiu Manatutu resulta ahi-han professor Pascoal Saldanha Soares nia kulit sai kanek no grave.

“Iha tuku 10:30, vítima Pascoal Saldanha Soares moras iha uma laran, feton sira halo modo iha dapur, sira seluk ba hotu to’os ona mak derepente ahi-han uma, nia la konsege halai sai, nune’e ahi-han nia isin lolon sira, kulit sira sai nabeen hotu”. Informa Xefe Suku Manelima Antônio Perreira ba Mídia Sapnews via telefone iha Laclubar, 29/04/2025.

Xefe Suku Manelima ne’e hatutan, “Hafoin akontese, ha’u to’o kedas iha fatin hodi haree no komunika ba Administrador postu no Xefe Saúde postu hodi komunika ba munisípiu maibe to’o agora seidauk mai, enkuantu ambulânsia ne’ebe iha Laclubar nia kondisaun sei aat, nune’e sei hein ambulânsia husi munisípiu”.

Antonio Pereira husu ba governu liliu parte relevante sira hodi fo ajudu emergênsia no asisténsia médiku urgênsia ba vítima Pascoal Saldanha Soares tanba sofre kanek grave iha isin-lolon.

“Ha’u rekomenda ba governu liliu MSSI no Autoridade Protesaun Sivil atu bele tulun família afetadu sira tanba inséndiu refere resulta vítima nia sasan uma laran la salva, oras ne’e sira laiha ona uma no hela fali iha família vizinu”.

“Husu ba Ministériu Saúde hodi halo asisténsia médiku urgênsia ba vítima ne’e tanba liu tiha oras haat ka lima, ne’e ita labele salva ona”. Nia husu

Enkuantu, durante inséndiu ne’e mosu família uma kain rua ne’ebe hela hamutuk iha uma ne’e balun sai ona ba to’os no vítima hela mesak iha kuartu laran, maibe to’o agora seidauk hatene kauza hosi inséndiu refere.

Jornalista : Guilhermino Ramos