Inundasaun Iha Espanha ! Ema 200 Resin Mate & Infraestrutura Barak Hetan Estragus

Imajem : rezultadu inundasaun iha Rejiaun Valénsia, Espanha.

SAPNewsTL, Dili : Relasiona ho inundasaun ne’ebé mosu iha Nasaun Amigu Espanha, Rejiaun Valénsia ne’ebé rezulta ema na’in atus rua resin mate, Governu Timor-Leste hato’o sentidu solidariedade ba Reinu España ne’ebé sofre inundasaun.

Governu Konstitusionál IX espresa ninia solidariedade kle’an ho Povu no Governu España ba inundasaun trájiku sira ne’ebé estraga rejiaun Valénsia hosi fulan-outubru nia rohan to’o inísiu fulan-novembru tinan 2024.

“Dezastre naturál ida-ne’e, hamosu hosi Depresaun Altitude Aas Izoladu (DANA), kauza udan boot ne’ebé rezulta ema 200 resin mate, maioria iha provínsia Valénsia, no destruisaun ba infraestrutura, uma no área agríkola sira”. haktuir Portal Governu Timor-Leste, 04/11/2024. SAPNewsTL Screenshot

Imajen hirak ne’e hasai hosi programa europeu Copernicus nian hatudu magnitude hosi estragu sira ho área luan sira ne’ebé hetan inundasaun no infraestrutura sira ne’ebé afetadu maka’as. Autoridade lokál sira kontinua hasoru dezafiu boot hodi tulun populasaun no rekupera área sira ne’ebé afetadu.

Portavós Governu Konstitusionál IX nian, Ministru Presidénsia Konsellu Ministru Agio Pereira espresa sentidu solidariedade ba povu no governu espanha tanba sofre inundasaun.

“Ha’u nia laran-dodok tebes ba lakon trájiku ema nia vida no ba difikuldade boot tebes ne’ebé povu españól hasoru iha momentu ne’ebé nakonu ho susar no provasaun ida-ne’e”. Nia sublinha

Inundasaun iha Espanha

Agio Pereira hatutan tan katak “Ami-nia hanoin hamutuk ho vítima sira no sira-nia família, no ami rekoñese esforsu eroiku sira hosi ekipa salvamentu no profisionál sira ne’ebé kontinua tulun komunidade sira ne’ebé afetadu hosi katástrofe ida-ne’e”.

Tuir informasaun ne’ebé SAPNews asesu katak inundasaun ne’e estraga infraestruturra, automóveis barak, uma populasaun inklui komunidade barak mak lakon vida.

Jornalista : Conzita Mota