Inundasaun La’os Sala Guvernu ! Marinho Konsidera Kauza Husi Valeta Klot & Soe Fo’er Arbiru
SAPNewsTL, Dili : Hafoin akontese udan boot durante oras haat iha kapital Dili, durante udan mosu inundasaun no rezulta bee invade estrada no bee tama komunidade sira nia uma inklui Kampus Fakuldade Ciensia Polítikas UNTL.
Iha intervista, Estudante Universidade Nasionál Timor Lorosa’e (UNTL) Marinho de Deus Pinto hateten, Sidade Dili sofre inundasaun tanba kauza husi valeta klot no komunidade sira ne’ebe soe fo’er arbiru tanba halo valeta sira intupidu.
“Normalmente mosu inundasaun iha sidade Dili tanba kauza husi valeta klot, iha ne’ebe drenagem la hatan ba volume bee ne’ebe boot no komunidade sira soe fo’er arbiru halo drenajem sira intupidu ikus mai bee labele movimentu ho diak ikus mai bee tama estrada no uma sira komunidade nian”. Tenik Estudante UNTL Marinho de Deus Pinto iha Kampus FCS Kaikoli, 09/01/2024.
Estudante UNTL ne’e mos husu ba komunidade sira atu labele beibeik soe fo’er arbiru tanba soe foer arbiru sai fator kauza ba inundasaun no moras sira hanesan maláriu no seluk tan
“Ha’u husu ba ema hotu liliu sira ne’ebe hela iha kapital Dili, moris iha sidade tenki hatene an katak kapitál nia ambiente ne’e ema hotu tenki kuidadu no proteja nia ambiente, signifika ita labele toman an soe foer arbiru tanba bele kontribui ba inundasaun no moras maláriu no seluk tan”. Marinho Pinto hateten.
Estudante ne’e mos husu ba komunidade sira atu labele fo sala deit ba guvernu tanba laos guvernu mak haruka ema soe foer arbiru ka guvernu mak halo udan monu rai, realidade natureza ema hotu tenki rekunhese hodi evita estraga ambiente liu husi la soe foer arbiru no halo uma iha fatin sira ne’ebe risku ba dezaste hanesan halo uma iha mota laran, mota ninin, valeta leten no valeta ninin tanba ida ne’e perigu ba vida humanidade nian.
“Ita labele fo sala deit ba guvernu wainhira inundasaun, ita so husu sira atu normaliza mota sira tanba laos guvernu mak haruka povu soe foer arbiru, nein halo uma iha mota laran ka ninin no valeta leten ka ninin”. Marinho dehan.
Iha sorin seluk, sidadaun Lenardo Machado informa, relasiona ho udan ne’ebe mosu iha kapital Dili liliu iha Postu Administrativu Dom Aleixo, iha area suku Fatuhada mosu inundasaun rezulta bee tama ba ema nia uman no tuir fali estrada.
“Udan ne’e mosu durante oras haat resin ona, durante udan mosu inundasaun tanba volume bee boot tebes liu drenagem ne’ebe iha, rezulta bee tama komunidade sira nia uma no halai tuir fali estrada”. Informa Sidadaun Leonardo Machado ba SAPNewsTL iha Fatuhada, 09/01/2024
Nia hatutan, se udan ne’e kontinua maka mota bele estraga hotu komunidade nia uma no sasan sira tanba drainagem klot la responde ba bee ho volume boot hanesan daudaun akontese.
Entretantu, situasaun ne’ebe hanesan akontese mos iha area Manleuana, Kaikoli, Markoni, Lurumata, Delta 1, Campu Baru, Hera no fatin sira seluk tan.
Hafoin inundasaun, SAPNewsTL mos seidauk asesu informasaun kona uma hira mak hetan estragus husi inundasaun maibe iha Suku Hera, Postu Administrativu Kristu Rei bee sobu komunidade balun nia uman no oras ne’e evakua ona ba igreja protestante Akanunu Hera.
Jornalista : Marcela Mesquita Lemos