Ipolito & Abrão Prontu Kompete Iha Eleisaun Prezidente LFTL
Imajem : Kandidatu Prezidente LFTL ba periodu 2025-2029. Foto : Media FFTL
SAPNewsTL, Dili: Orgaun Liga Futebol Timor-Leste (LFTL) rejistadu ona kandidatu Ipolito Soares no Abrão Oliveira, sira nia parte prontu kompete iha eleisaun ba prezidente foun 2025-2029.
“Kandidatu rua ami rejistadu ona mak Ipolito Soares eis prezidente Assalam FC no Abrão Oliveira eis prezidente Zebra FC maka ami verifika ona prontu ba kompete iha kongresu realiza iha loron 1 fulan marsu 2025”, dehan vise prezidente asembleia jeral Osorio Florindo da Conceição ba jornalista sira liu konferensia imprensa iha Estadium Municipal Dili, sesta (21/02/2025).
Osorio hatutan tan, semana kotuk ami halo konferénsia imprensa anunsia formulariu para kandidatu sira prense hodi kompete ba estrutura orgaun LFTL foun periodu 2025-2029, nune’e horseik loron 20 fulan fevereiru 2025 data ikus ba rejistrasaun.
Nia salienta tan, sira simu ona pakote rua, nune’e komisaun halo ona verifikasaun, komisaun iha ona konkluzaun katak pakote rua iha ezibilidade prense rekezitu komisaun fo sai tuir estatutu, tan ne’e sira submete pakote rua ne’e ba kongresu.
Entretantu, iha kongresu LFTL daruak realiza iha loron 1 fulan marsu 2025 sei hili prezidente ho vise prezidente foun periodu 2025-2029 no mos sei hili konsellu fiskal no judisional.
Reportajen: Augusto Dos Santos
