Kampiaun “Taça Xanana 2024” Sei Hetan Premiu 8,000 USD
Imajem : Prezidente komisaun organizador Feliciano Perpetua, hamutuk ho estrutura halo konferensia imprensa iha Estadium Munisipal Díli kuarta (01/05/2024).
SAPNewsTL, Díli – Klube kampiaun ba “Taça Rotativa Maun Boot Kayrala Xanana Gusmão 2024” sei hetan premiu 8000 USD.
“Taça Rotativa Maun Boot Kayrala Xanana Gusmão 2024″ ne’e ita sei fo premiu 8.000 USD ba kampiaun, prémiu ne’e toma konta husi patrosinador banku BRI Timor-Leste, manan nain daruak sei simu 4600 toma konta husi patrosinador Telemor, manan datoluk sei hetan 3.000 toma konta husi patrosinador banku Mandiri no manan nain dahaat sei simu 1750 USD toma konta husi patrosinador Vernie unipesoal Lda”.
“Ita mos sei fo prémiu ba ekipa fair play, mellor markador no mellor guarda redi, depois klube husi 32 hakat ba oitavu final to’o semi final sei simu premiu, jogu toma konta nafatin husi patrosinador Vernie unipesoal Lda ho Dellos”, dehan prezidente komisaun organizador Feliciano Perpetua ba jornalista sira liu husi konferensia imprensa iha Estadium Munisipal Díli kuarta (01/05/2024).
Prezidente hatutan, Tasa ida ne’e realiza atu komemora anniversariu Jose Alexandre Kayrala Xanana Gusmão ba idade 78, nune’e premiu kampiaun husi klube 32 ne’e 7.800 USD bazeia ba Jose Alexandre Kayrala Xanana Gusmão nia idade ho bonus 200 nune’e total 8000 USD, premiu manan daruak sira fo 4600 USD bazeia ba Jose Alexandre Kayrala Xanana Gusmão nia moris iha tinan 1946, iha mos premiu ba sira seluk maibe ne’e komisaun la bazeia ona buat ruma.
Nia informa tan, jogu ne’e sei abertura iha loron 2 fulan maiu 2024 depois sei remata iha fulan jullu maibe data seidauk konfirmadu tanba sei bazeia ba Jose Alexandre Kayrala Xanana Gusmão nia tempu.
Jogu ne’e realiza tanba hetan suporta masimu husi patrosinador banku BRI Timor-Leste, Telemor, banku Mandiri, MJDAC, Vernie Unipesoal Lda, Dellos no Timor GAP no jogu sei dirije husi arbitrajen Timor-Leste.
Entretantu, jogu ne’e sei kompete husi klube 32 mak Relay Laleia FC, Buradu FC, Buruma FC, Zhavia FC, Kampo Alor FC, Mulia FC, Bita-ba, Surya Lafaek Haksolok FC, Letefoho FC, Naimeco FC, Sousa United FC, Coach Eleven FC, AS Kantada, Dark Blue FC, União Fortaleza FC, Jomar FC, Laivai Afisafa FC, UEP FC, Aimou FC, Vila Vista FC, Lecidere FC, Ostico FC, Hera United FC, AC Laporan Wekeke, Warikoan FC, Assa FC, Bairro Da Paz FC, Irmão Timor FC, Daudere United FC, Taibesse FC, Laisorulai FC no Maubale FC.
Reportajen: Augusto dos Santos